Регион
Американскиот генерал Данфорд во мисија на смирување на тензиите со Турција
Началникот на американскиот здружен штаб на вооружените сили, генералот Џозеф Данфорд, највисок американски офицер, во понеделникот во текот на посетата на Истанбул се обиде да ги ублажи тензиите со Турција, сојузничка во НАТО, која е гневна на Западот поради млаката поддршка на владата по неуспешниот обид за воен преврат од 15-ти јули и колебањата на САД да го екстрадираaт исламистичкиот клерик Фетулах Ѓулен, кого турските власти го сметаат за одговорен за неуспешниот пуч и поткопувањето на турската држава.
Официјална Анкара последните две седмици во повеќе наврти ги обвини своите западни сојузници дека повеќе се загрижени за судбината на пучистите отколку за фактот дека тие се обиделе да соборат демократски избрана влада.
„Многу важно е САД, нашиот пријател и сојузник, да искажат јасен и решителен став во врска со обидот за терористички удар на нашата нација и демократија“, му кажал турскиот премиер Бинали Јилдирим на американскиот генерал Џозеф Данфорд.
Јилдирим, исто така, повторил дека Турција очекува дека Фетулах Ѓулен, кој од 1999 година живее во доброволен егзил во американската сојузна држава Пенсилванија, ќе ѝ биде предаден. Ѓулен, пак, повеќепати ја отфрли својата вмешаност во пропаднатиот обид за преврат, додека Вашингтон побара од Анкара да приложи „релевантни докази“ за неговата вмешаност.
Генералот Данфорд, главниот воен советник на американскиот претседател Барак Обама, го осудил пропаднатиот обид за воен удар и изјавил дека неговата посета претставува израз на солидарност, како и дека САД во целост ја поддржуваат турската демократија
Истовремено пред американската амбасада во Анкара се собраа неколку стотици демонстранти, кои му порачуваа на генералот Данфорд „да си замине дома“ и „да го предаде Ѓулен“.
Американскиот претседател Обама во меѓувреме изјави дека Вашингтон ќе го израчи Ѓулен само доколку Турција достави „уверливи докази“. Турскиот претседател Реџеп Тајип Ердоган, пак, порача дека државните институции ќе бидат „исчистени од карциномот наречен Ѓулен“.
Европската унија, како и САД, изрази загриженост поради „обемот на чистките“ во Турција по обидот за пуч. „Емоциите непосредно по обидот за воен удар се разбирливи, но сега сме сведоци на една низа од пучеви во Турција“, изјави за европските медиуми функционер во ЕУ, кој барал да остане анонимен./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сообраќајка на бугарски автобус во Турција, повредени 11 лица
Единаесет лица се повредени кога автобус со бугарски регистарски таблици што сообраќал од Истанбул за Бугарија се превртел во областа Киркларели во Турција, јави агенција та Анадолија.
Сообраќајната несреќа се случила на 50 километри од бугарската граница. Автобусот е на компанијата „Метро туризам“.
На местото на несреќата се упатени екипи на полиција и медицински лица.
Повредените, вклучувајќи го и возачот на автобусот, се хоспитализирани во околните болници.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.