Регион
Анкара гневна поради германска сатира
Турското министерство за надворешни работи го повика германскиот амбасадор во Анкара на разговор поради сатиричниот прилог емитуван на германскиот јавен сервис NDR во кој се критикува авторитарното однесување на турскиот претседател Реџеп Тајип Ердоган.
„Германскиот амбасадор во Турција, Мартин Ердман, мораше во текот на двочасовниот разговор да се правда поради двеминутниот сатиричен прилог во емисијата ‘Extra3’ на јавниот сервис Северногерманската радио-телевизија NDR. Притоа не станувало збор за вообичаено разменување на мислења, како што е тоа обичај во рамките на дипломатскиот кор, туку за повикување на ред во невообичаено остар тон“, пишува во вторникот германскиот неделник Der Spiegel повикувајќи се на дипломатски кругови.
Турските функционери на германскиот амбасадор му се пожалиле поради сатиричната песна „Erdowi, Erdowo, Erdogan“ (обработка на хитот на поп пејачката Нена од 1980-те „Irgendwie, irgendwo, irgendwann”), во која се критикува односот на турскиот претседател Реџеп Тајип Ердоган кон медиумите, но и неговото живеење во наводен раскош.
„Новинарот кој нешто ќе напише, што на Ердоган не му е по волја, веќе утредента ќе се најде во затвор“, се наведува во еден стих од песната. Во друг, пак, се зборува за „Фалбаџијата од Босфор кој живее на висока нога“.
Истовремено турскиот претседател Ердгоан жестоко ги критикуваше странските дипломати, меѓу другите и германскиот и британскиот амбасадор во Анкара, поради нивното присуство во судница на почетокот од судскиот процес против новинарите Чан Дундар и Ердем Ѓул поради текстот во кој се документира дека турската тајна служба транспортирала оружје за исламистичките групи во соседна Сирија под превезот на хуманитарна помош.
Ердоган во таа пригода изјави дека овие дипломата „нема што да бараат во судницата“, како и дека „ова е Турција, а не нивната земја“, што беше протолкувано како индиректна закана за протерување на дипломатите.
Турските власти неодамна одбија да му ја продолжат акредитацијата на дописникот на германски Der Spiegel од Турција, кој беше познат по својот остра и критички став кон стилот на исламско конзервативната влада и претседателот Ердоган./крај/мф/сн
Извор: DPA
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.