Регион
Додик не добил американска виза за инаугурацијата на Трамп
Претседателот на Република Српска, Милорад Додик изјавил дека американската амбасада во Босна и Херцеговина (БиХ) му го одбила барањето за дипломатска виза за да може да присуствува на инаугурацијата на новоизбраниот американски претседател Доналд Трамп на 20-ти јануари во Вашингтон, пренесува РТРС.
Додик навел дека објаснувањето за таквата одлука на американската амбасада било дека „тој таму нема да оди како претставник на БиХ“. „Тогаш зошто ми служи дипломатскиот пасош на БиХ?“, запрашал Додик и додал дека не ја исклучува можноста да се откаже од пасошот, како и дека е сѐ поизвесно дека во следната година ќе патува со својот српски пасош.
Претседателот на Република Српска нагласил дека поканата ја добил од луѓето кои биле од изборниот штаб на Трамп, а кои се дел и од тимот кој се бави со транзицијата од претходната во новата американска администрација. Тој навел дека акредитациите сега го чекаат во Вашингтон, но дека за жал нема да може да биде таму.
Додик за РТРС исто така детално го раскажал телефонскиот разговор кој минатата година го имал со американскиот заменик помошник државен секретар Хојт Ји, кој од него барал да се откаже од политиката на својата партија СНСД (Сојуз на независни социјалдемократи) и да одговори на повиците на Обвинителството на БиХ. Според Додик, сето ова било „хајка во режија на американската амбасадорка во БиХ, Морин Кормак“.
„Целата хајка настана од моментот кога на официјалниот список се најде името Милорад Додик и секако сертификатот на кој пишува Милорад Додик и поканата за настанот“, рекол тој. РТРС пренесува дека Ји во телефонскиот разговор го обвинил Додик за застојот на БиХ на патот кон ЕУ и побарал СНСД да се откаже од декларацијата во врска со процесите во 2018-та година.
„Јас реков дека за тоа што БиХ е во криза највеќе е виновна старата американска администрација и побарав сами да ја напуштат БиХ и повеќе да не се мешаат. Реков и дека СНСД нема да се откаже од својата политика. Ден откако го имав тој разговор мене ми беше одбиена американската виза со објаснување дека таму нема да одам како претставник на БиХ“, рекол Додик./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.