Регион
Двајца сириски бунтовници обезглавени во Турција
Двајца сириски опозиционери и противници на џихадистите од Исламската држава, во петокот се најдени во една куќа во југоисточната турска покраина Шанлиурфа, изјавил за AFP портпаролот на групата „Рака ја масакрираат во тишина“, додека турските медиуми наведуваат дека станува збор за сириски опозициски новинари.
Телата на Ибрахим Абдулкадер, главен уредник на сирискиот весник Syrian Ayn Vatan, и Фираз Хамади, репортер во истиот весник, кои побегнале од конфликтот во нивната земја, се двајцата убиени во Шанлиурфа, пренесува турската новинска агенција Dogan.
Безживотните тела биле пронајдени од страна на нивните сириски пријатели, кои повикале полиција и брза помош. Според првичните извештаи, еден или повеќе напаѓачи, кои засега се неидентификувани, а се сомнева дека се припадници на џихадистичката Исламска држава, ги отсекле главите на своите жртви со ловечки нож.
Се тврди, исто така, дека двајцата новинари биле припадници на опозициска Слободна сириска армијa (FSA), која во сирискиот конфликт ја има поддршката од Турција и западните земји, како и дека примале смртни закани од Исламската држава поради нивните медиумски извештаи за џихадистичката организација.
Турската полиција соопшти дека истрагата продолжува, а седумте Сиријци кои ги пронашле мртвите тела и побарале помош, се во полиција каде треба да ги дадат своите искази.
Според основачот на групата „Рака ја масакрираат во тишина“, Абу Мохамад, двајцата убиени потекнувале до Рака, а нивните тела „се откриени обезглавени во петокот утрото“ во домот на Хамади.
На официјалната Facebook страница на групата основана во април 2014 година, за нивното убиство е обвинета Исламската држава. Оваа група води евиденција за злосторствата што ги извршува Исламската држава во Рака, градот во северна Сирија кој џихадистите го освоија во јануари 2014 година и важи за неформална престолнина на нивниот ткн „калифат“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.