Регион
Две жртви и еден исчезнат во новите поплави во БиХ
Телото на маж и на жена од Босна и Херцеговина се пронајдени во возило во надојден поток во општината Челинац недалеку од Баља Лука, и се претпоставува дека станува збор за жртви на поплавите кои од вторникот повторно ја погодија земјата.
Припадниците на полицијата од Бања Лука ги откриле во средата навечер телата на двете лица во местото Бараковци кај Челинац, но сé уште не успеале да ги извадат, имајќи предвид дека се наоѓаат на тешко пристапен терен, соопшти локалната полиција во четвртокот. Возилото на настраданите, како што се претпоставува, поројот веројатно прудолу го однел во надојдениот поток каде што се задушиле. Според портпаролката на Центарот за јавна безбедност на Бања Лука, Марија Маркановиќ, пожарникарите со специјализираните возила се обидуваат да дојдат до безживотните тела на мажот и жената кои се наоѓаат на тешко пристапен терен.
Според сознанијата на локалните медиуми, станува збор најверојатно за 37-годишниот Дарко Станојевиќ чие исчезнување било пријавено во вторникот на 5-ти август, и за 42-годишната Петра Живковиќ од Челинац. Станојевиќ бил татко на четири деца, а Живковиќ мајка на три малолетника.
Полицијата не објави точно на кој начин настрадале овие две лица, а соопшти дека уште едно лице се води како исчезнато во поплавите.
Поплавите во БиХ, кои се повторуваат по три месеца, предизвикаа и нови штети во многу општини. Владата на Дистриктот Брчко прогласи состојба на елементарна непогода поради поплавите кои во текот на изминатите три дена го погодија ова подрачје.
Покрај во Брчко, забележани се и во општините Лукавац, Завидовиќи, Грачаница и во други градови главно во централниот и северниот дел од Босна./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.