Регион
Ектремисти држат во заложништво турски обвинител
Турските екстремни левичари во заложништво земаа во вторникот обвинител во Истанбул и се закануваат дека ќе го убијат, по што во судот влегоа специјалците, а полицијата ја евакуира зградата, пренесуваат медиумите
Револуционерниот фронт за народно ослободува (DHKP-C) објави фотографија на обвинителот Мехмет Селим Кираз во истанбулска судница со вперен пиштол во главата и најави дека ќе го убие во 15.36 часот, три часа откако упаднаа во зградата, доколку не бидат исполнети нивните барања.
Во заднината се гледа знаме на спомнатиот Револуционерен фронт за народно ослободување.
Според последните податоци, се слушнале и неколку истрели, но сé уште не се знае дали некој настрадал.
Обвинителот ја води истрагата за смртта на 15-годишниот Беркин Елван, кој почина по 269 денови кома во којашто падна откако го погоди патрон за солзавец во текот на антивладините протести на 11-ти марти 2014 година. Момчето не учествувало во протестите, туку отишло да купи леб.
„Преговорите се одвиваат преку посредник кој го одбрале киднаперите“, вели за Hurriyet заменикот обвинител, Ведад Јигит.
Новинар на весникот, Динчер Гокче, го повикал обвинителот на телефон, но се јавил машки глас кој рекол дека тој не е во можност да разговара, а кога новинарот го прашал кој се јавува на неговиот телефон, врската се прекинала.
Хусеин Ајгун, потпретседател на најголемата опозициска партија во Турција, Народната републиканска партија, на Twitter напиша дека го контактирал таткото на починатото момче кој апелира да се ослободи обвинителот.
„Мојот син умре, не мора да згасне уште нечиј живот“, вели Сами Елван.
Според halkinsesi.tv, телевизија блиска до спомнатата организација, киднаперите на власта и дале рок до 15.36 часот да ги исполнат нивните барања, а тоа се полициски службеници во живо на телевизија да го признаат убиството на Беркин Елван, да им се суди на виновниците на „народен суд“, а да се донесе ослободителна пресуда за сите уапсени на маршот за солидарност за Елван.
Полицијата ја опколила канцеларијата која се наоѓа на шести кат во истанбулскиот суд и ги затвориле сите приоди кон зградата.
DHKP-C на својата интернет страница, исто така, објави дека сака полицаецот кого го сметаат за одговорен за убиството да го признае злосторството пред телевизиски камери, на сите вмешани полицајци да им биде судено на „народните судови“ и да се отфрлат обвиненијата против оние кои учествуваа на протестите по повод смртта на Елван.
Премиерот Ахмет Давутоглу во меѓувреме се сретна со сегашните и поранешните министри за правда и за внатрешни работи во седиштето на владејачката партија Партија на правдата и развојот (AKP), во Анкара за да ја разгледаат заложничката криза../крај/мф/бб
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Европскиот парламент одобри визна либерализација за Србите од Косово
Европскиот парламент денеска одобри визна либерализација за имателите на српски пасоши од Косово, кои ги издава Координативната управа на Србија на предлог на европратеникот и известувач за укинување на тие визи, Матјаж Немец.
За извештајот на Немец гласале 406 од 597 европратеници, 97 биле против, а 94 биле воздржани.
По гласањето во ЕП, последниот збор за овој предлог треба да го дадат министрите на Советот на ЕУ.
Претходно овој месец, амбасадорите на земјите членки на ЕУ се согласија со предлогот на ЕП и Советот на ЕУ за измена на регулативата за иматели на српски пасоши издадена од Координативната управа на Србија, со која се доделува визна либерализација на носителите на овие пасоши, пишува српската новинска агенција „Танјуг“.
Претходно, Комитетот за граѓански слободи, правда и внатрешни работи на ЕП на 9 април го усвои нацрт-извештајот за визна либерализација.
Целиот Западен Балкан ќе има ист визен режим за патување во ЕУ
Оваа одлука гарантира целиот регион на Западен Балкан да има ист визен режим за патување во ЕУ, објави тогаш ЕП.
Постои можност одлуката за визна либерализација за имателите на српски пасоши во Косово да почне да се применува до почетокот на летото.
Србите од Косово се единствените од Балканот на кои им е потребна виза за ЕУ
Србите од Косово и Метохија, кои поседуваат пасоши издадени од Координативната управа, која функционира во рамките на Министерството за внатрешни работи на Србија, се единствените на кои им е потребна виза за влез во земјите на ЕУ откога од 1 јануари годинава беа укинати визите за граѓаните на Косово.
Во ноември 2023 година Европската комисија предложи да почне постапка за вклучување на граѓаните на Косово, кои имаат пасоши издадени од Координативната управа на Србија, преку визна либерализација.
Регион
Додик повторно во Русија: Имаме притисок, но остануваме посветени на добрите односи со Москва
Лидерот на босанските Срби, Милорад Додик, повторно отпатува во Русија за да ја изрази својата желба за зајакнување на односите со режимот на Владимир Путин, а денеска на средбата со шефот на рускиот Совет за безбедност, Николај Патрушев, тоа го потврди. Додик отпатува за Санкт Петербург, каде што ќе учествува на меѓународниот безбедносен форум организиран од руските власти, а таму го однесе и министерот за безбедност на БиХ, Ненад Нешиќ, со чија партија е во коалиција на државно ниво.
Како што објави јавниот сервис на Република Српска (РТРС), Додик веднаш се сретнал со Патрушев, кој се смета дека е еден од најблиските соработници на Путин. Двајцата разговараа за соработката меѓу РС и Русија, а Патрушев особено ги пофали добрите лични односи меѓу Додик и Путин.
„Вашите одлични лични односи со претседателот на Русија, Владимир Путин, водат до одлични односи меѓу РС и Руската Федерација“, рече Патрушев на средбата додавајќи дека е свесен оти РС е под голем притисок поради тоа.
Додик одговори дека нема да го поколебаат притисоците.
„Ние сме под голем притисок, но остануваме посветени на добрите односи со Русија“, рече Додик.
Актуелниот претседател на РС, кој е под санкции на САД и Велика Британија, отпатува во Русија во време кога Босна и Херцеговина се соочува со сериозна политичка криза. Министерот за надворешни работи на БиХ, Елмедин Конаковиќ, во понеделникот предупреди дека односите во владејачката коалиција се најлоши досега.
Кризата беше предизвикана од барањето на Додик за укинување на техничките измени на изборниот закон, кои беа наметнати во март од високиот претставник за БиХ, Кристијан Шмит, како и противењето на најавеното усвојување на резолуцијата во Обединетите нации, со која би се прогласил 11 јули како ден за сеќавање на жртвите од геноцидот во Сребреница.
Поради оваа причина, Додик ги актуализира своите закани за независност на РС и тоа го стори во пресрет на заминувањето во Русија.
„Не можеме да живееме со оние што работат против нас. Време е секој да тргне по својот пат“, изјави вчера Додик.
Регион
(Видео) Во Хрватска падна снег
На подрачјето на Горски Котар во Хрватска синоќа падна снег, а на места имаше и вистинска снежна покривка.
Снег ја зафати и горанската делница на автопатот А6 Риека – Загреб, но работниците на зимската служба минаа низ снегот и до утрово нема ограничувања во сообраќајот, јавува Н1.