Регион
Филе: Земјите членки на ЕУ се одговорни за проширувањето
Во пресрет на извештаите на Европската комисија (ЕК) за напредокот на земјите кандидати во евроинтеграциите, еврокомесарот во заминување Штефан Филе порача дека земјите членки на Унијата мора да сфатат дека се одговорни за проширувањето.
„Ова ќе биде мој последен извештај, и ќе биде посебен бидејќи ќе ми дозволи да се осврнам на три работи: проширувањето, земјите членки и кандидатите. Во однос на проширувањето, започнавме да ги градиме новите основи на политиката на проширувањето, една политика со кредибилитет и која се однесува на основите. Откако претходно беше претставен новиот пристап во преговорите за проширување, со отворање на почетокот на поглавјата 23 и 24 кои се однесуваат на владеење на правото и основните слободи, вториот столб е економско управување за земјите-кандидати, со цел истите да бидат во линија со економските и трговски политики на ЕУ и да ги допрат конкурентноста, растот и креирање на работни места во своите земји. Третиот столб ќе бидат административните реформи, односно засилувањето на демократските институции“, изјави Филе.
Според чешкиот еврокомесар, проширувањето не е на автопилот, а затоа граѓаните на земјите членки, не властите, треба да видат дека проширувањето сè уште е кредибилна и релевантна политика.
Во однос на земјите кандидати за членство во Европската унија, еврокомесарот потенцира дека претстојните извештаи се придонес во борбата не само со заморот од проширувањето, туку и со заморот од спроведување на реформи, а ЕК ќе настојува граѓаните на овие земји да го почувстуваат бенефитот од проширувањето./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.