Регион
Грција изброи 32.000 бегалци и се жали дека не сакаат да останат во прифатилиштата
Бројот на бегалците и имигрантите во Грција достигна 32.000, од кои 6.857 на островите и 25.000 во континенталниот дел од земјата, изјави во четвртокот помошникот министер за одбрана Димитрес Вицас, а министерот за заштита на граѓаните Никос Тоскас предупреди дека бегалците кои стигнуваат во земјата не сакаат да останат во прифатните центри туку „итаат“ на границата со Македонија надевајќи се дека „што побрзо ќе минат“ кон северот на Европа.
„На островите во Егејското Море во моментов се наоѓаат 6.857 мигранти кои пристигнаа од турското крајбрежје, а во континенталниот дел ги има речиси 25.000“, изјави помошникот министер за одбрана Димитрес Вицас. Истакна дека ситуацијата е многу сериозна на северната граница меѓу Грција и Македонија, каде на премин на граничната линија и пат кон северна Европа чекаат повеќе од 11.500 луѓе.
Грчкиот премиер Алексис Ципрас во петок би требало да го објави деталниот план на својата влада за управување со мигрантската криза, откако ќе се сретне со челниците на сите политички партии. Грција последните десет дена успеала да обезбеди за мигрантите 10.000 места во центрите за нивно прифаќање, а секој ден прехранува илјадници луѓе, објави владата.
„Постои голем проблем, ситуацијата е многу тешка: тие луѓе се очајни и се обидуваат на сите начини да ја минат грчко-македонската граница и да тргнат кон северот на Европа, изјави министерот за заштита на граѓаните Никос Тоскас за јавната телевизија Ert.
Иако грчката влада го „покрена целиот државен систем, војската и локалната управа“ и „отвори бројни прифатни центри на северот, во другите делови од земјата и близу Атина“, бегалците „итаат кон Идомени за да влезат во Македонија“, додаде.
Илјадниците имигранти чекаат на грчката страна од границата во надеж дека ќе ја минат, откако Македонија почна да пропушта по неколку стотина дневно, заштитувајќи се од сличните одлуки кои претходеа од страна на некои земји од ткн балканска рута и земји членки на Европската унија.
„Тие луѓе сé уште не се свесни дека границите всушност се затворени“, изјави Тоскас потсетувајќи дека од вторникот само на 600-ини лица им е одобрено преминувањето на границата. Истовремено, „Турција продолжува да испраќа имигранти, повеќе од 2.200 луѓе пристигнаа на грчките острови последните 24 часа“, се пожали Тоскас./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.