Регион
Грција предлага замена на долгот, бара повеќе време за реформите
Новата влада на Грција предложи во понеделникот навечер замена на надворешниот долг со обврзници врзани со растот за да може оваа економски исцрпена земја да добие повеќе време и фискален простор за спроведување на неопходните реформи.
Новиот грчки премиер Алексис Ципрас и министерот за финансии Јанис Варуфакис уште изминатиот викенд тргнаа во дипломатска офанзива во земјите од Европската унија за да ги претстават своите предлози за враќање на огромниот грчки долг, кои не се темелат на штедењето, што го сметаат за погубно за населението и за грчката економија. Подоцна во вторник, премиерот Ципрас ќе се сретне со италијанскиот колега Матео Ренци, а министерот Варуфакис од Париз отпатува во Лондон каде во понеделникот разговараше со британскиот министер за финансии Џорџ Озборн и со меѓународни инвеститори.
Неименуван извор на агенцијата Reuters рече дека грчкиот министер во Лондон ги убедувал инвеститорите оти не сака судир со Европската комисија околу новиот договор за враќањето на долгот. Според пишувањето на лондонскиот деловен дневен весник The Financial Times, Варуфакис својот план го нарекол „мени за замена на долгот“, што значи дека Атина повеќе не бара отпис на 315-те милијарди евра странски долг, како што толкува весникот.
„Ќе им кажам на нашите партнери дека составуваме комбинација од примарен буџетски вишок и план за реформи. Ќе им кажам ’помогнете ни да ја реформираме нашата земја, дајте ни фискален простор тоа да го сториме, бидејќи во спротивно и натаму ќе се гушиме па нема да бидеме реформирана туку деформирана Грција’“, изјави за весникот министерот Варуфакис.
Грчкиот министер Варуфакис во понеделникот доцна ноќта издаде соопштение во кое се истакнува дека неговите изјави пред финансиските вложувачи погрешно се протолкувани. Не ги наведе притоа деталите, но Reuters укажува на зачестеното пишување на грчките медиуми дека постепено се повлекува од владината цел за намалување на долгот. „Владата и министерот за финансии нема да се повлечат, колку и нашата решителност да ги жалости некои луѓе“, се наведува во соопштението.
Reuters наведува, пак, дека на состанокот со грчкиот министер за финансии во понеделникот ноќта учествувал и основачот и извршниот директор на хеџ фондот CQS, Мајкл Хинце, британско-австралиски бизнисмен, еден од големите донатори на Конзервативната партија,, кој на прашањето дали министерот предложил замена на долгот одговорил „Во прашање е нешто повеќе избалансирано и пошироко“, ненавлегувајќи во детали.
Грција е под притисокот да го продолжи договорот со меѓународните доверители , Европската комисија, Европската централна банка (ECB) и Меѓународниот монетарен фонд (ММФ) кој истекува на 28-ми февруари. Новата влада во Атина, предводена од коалицијата на радикалната левица Сириза, која во предизборната кампања вети прекинување на договорот со „тројката“ странски кредитори и завршување на непопуларните мерки за жестоко штедење договорени со споменатата спогодба, сега не може да се задолжува на меѓународните пазари, а по истекот на договорот со кредиторите, ECB теоретски би можела да биде обврзана да го сопре финансирањето на грчките банки.
Во практиката би можело да се пронајде алтернативно решение за овој проблем, а потоа на Грција во март и’ доспеваат за наплата големи рати од долгот. Грчки функционери тврдата дека можеби Атина има доволно пари за подмирување на тие обврски, со што овој проблем би бил одложен до доцната пролет.
Во меѓувреме и Русија сигнализираше дека е подготвена да и’ помогне на Грција. Рускиот министер за финансии, Антон Силуанов изјави минатиот четврток дека Русија ќе го разгледа давањето финансиска помош на со долгови оптоварената Грција, доколку Атина тоа го побара. „Можно е да се замисли која и да е ситуација, и доколку такво барање ѝ биде упатено на руската влада, дефинитивно ќе го разгледаме, но ќе ги земеме предвид сите елементи на билатералните односи меѓу Русија и Грција“, изјави Сулианов за американската телевизиска мрежа CNBC.
Грчкиот премиер Ципрас на прес-конференција на Кипар, веднаш по неговата инаугурација, изјави дека во Атина „засега не разгледуваат други опции“ за враќање на долгот. Ги повтори повиците на својот министер за финансии да се укине механизмот на експертските инспекции коишто го воспостави „тројката“ доверители, и да биде заменет за директни преговори меѓу Грција и нејзините странски доверители. „Верувам дека тоа би бил зрел и неопходен чекор напред за Европа“, истакна Ципрас./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.