Регион
Грција загрижена и бесна поради заканите за изолација во врска со бегалците
Грција во вторникот ја отфрли идејата на Белгија да воспостави кампови за стотици илјади имигранти и бегалци на својата територија, стравувајќи дека може да биде пренатрупана со лица на коишто би им бил оневозможено натамошното заминување кон северна Европа.
Во понеделникот вечерта белгискиот државен секретар за миграции Тео Франкен изјави во интервју за телевизијата VRT дека Грција би требало да организира засолништа за околу 300.000 луѓе „во големи бегалски логори“ на своето крајбрежје.
„Грција е во тешка ситуација“, возврати во вторникот грчкиот министер за миграции Јоанис Мусалас во интервјуто за радиото Skai. Додаде дека Белгија барала од Атина и да ги враќа имигрантите, но додаде дека тоа е „противправно“. „Земјите се во паника поради огромниот број доаѓања“, рече Музалас.
Грција е главниот влез за имигрантите и барателите на азил кои се надеваат на подобар живот во Европа. Владата во Атина се најде на удар на критиките, бидејќи дозволува имигрантите да минуваат низ нејзината територија во голем број и непријавени, иако таа треба да ја контролира својата граница со Турција.
Како што расте притисокот врз Грција, во земјата сé повеќе се стравува дека таа би можело да остане изолирана од остатокот на Европа и оти би се претворила во своевидна тампон зона на којашто ќе се најдат на грчка територија затечените илјадници имигранти.
Најдалеку во тие притисоци отиде Австрија, чијашто министерка за внатрешни работи Јохана Микл-Лајтнер во понеделникот по вторпат за кусо време ја предупреди Атина дека надворешната граница на шенгенскиот простор може да биде пренесена кон средна Европа, или веќе на македонско-грчката граница, доколку грчките власти не воспостават ефикасна контрола на границата кон Турција. Сепак, Европската комисија соопшти дека тоа „не е најизгледната“ опција.
Грчките медиуми во вторникот објавуваат гневни реакции на ваквите предлози, па така дневниот весник Elefterios Typos објави насловен текст под заглавие „Сакат да нé стават во карантин“.
Министрите за внатрешни работи на земјите членки на Европската унија во понеделникот вечерта на средбата во Амстердам ја повикаа Европската комисија да подготви права и политичка предлошка за можното воспоставување гранични контроли во рамките на шенгенскиот простор на период до две години,за разлика вод вообичаените шест месеци, во време кога напорите на Брисел да ја контролира незабележаната досега мигрантска криза имаат речиси никакви ефекти.
Портпаролката на Европската комисија, Наташа Берто, изјави во вторникот дека можно е да постојат основи да се извршат проверки во рамките на Шенген зоната „сé додека надворешните граници не се контролираат ефикасно“, додавајќи дека Комисијата „се подготвува за сите можности“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Силно невреме со поплави во Грција, Волос без струја
Силно невреме ја зафати Грција, поточно Лариса, каде обилните дождови доведоа до излевање на канализацијата, која ги поплави улиците, а во Волос е забележан и прекин на струја.
Врз основа на податоците од метеоролошката станица на Националната опсерваторија во Атина, измерени се просечни 100 милиметри дожд или максимални 312 милиметри на час, поради што полицијата мораше да го прекине сообраќајот бидејќи улиците беа поплавени.
Во градот Волос во текот на ноќта имало проблеми со струјата, но како што пренесуваат грчките медиуми, се е брзо ставено под контрола.
Министерот за цивилна заштита и климатска криза Василис Кикилијас од вчера е во Тесалија за внимателно да го следи развојот на невремето.
– Имаше оправдана загриженост на граѓаните овде во Тесалија бидејќи сеќавањата за катастрофата се свежи, затоа бевме сите овде, координирани и организирани. Драго ми е затоа што досега овој напор се исплатеше. Само со заедничка и координирана работа можеме да добиеме многу добри резултати – најави тој.
Силен дожд и невреме го зафати јужниот дел на Пелион, а како што јавуваат медиумите паднал и град. Овој регион во септември минатата година беше соочен со разорни поплави.
Ненадејна промена на времето се случи и на големите височини во централна и северна Грција, каде падна снег.
„Снежно невреме е забележано во ски-центарот на Василица“, се наведува.
Во меѓувреме, населението е најмногу загрижено за земјиштето околу езерото Карла на границата на Магнезија и Лариса, кои беа поплавени во септември минатата година. Полињата, па дури и воените инсталации во Стефановики се под тони вода.
Регион
Сообраќајка на бугарски автобус во Турција, повредени 11 лица
Единаесет лица се повредени кога автобус со бугарски регистарски таблици што сообраќал од Истанбул за Бугарија се превртел во областа Киркларели во Турција, јави агенција та Анадолија.
Сообраќајната несреќа се случила на 50 километри од бугарската граница. Автобусот е на компанијата „Метро туризам“.
На местото на несреќата се упатени екипи на полиција и медицински лица.
Повредените, вклучувајќи го и возачот на автобусот, се хоспитализирани во околните болници.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.