Регион
Грците на референдум на 5-ти јули ќе се изјаснат за предлогот на доверителите
Грчкиот премиер Алексис Ципрас го одреди 5-ти јули како датум на кој ќе се одржи референдум на кој ќе биде поставено прашањето да се прифати или не предлогот на грчките доверители за дополнително петмесечно финансирање на земјата во замена за реформите кои треба да доведат до нови буџетски заштеди.
По пет месеци преговори, во текот на кои левичарската влада во Атина се обиде да договори нови услови за странската финансиска помош кои нема да ги вклучуваат непопуларните мерки за строго штедење, институциите на кредиторите (Европската комисија, Европската централна банка и Меѓународниот монетарен фонд – з.м.) почнаа да поставуваат неприфатливи предлози и ултиматуми, кои не се во согласност со принципите на Европската унија, рече во телевизиското обраќање до нацијата доцна ноќта ко саботата, грчкиот премиер Алексис Ципрас.
Тој претходно вечерта се врати во Атина од Брисел, и одржа вонредна седница на владата на којашто се дискутираше за последните предлози изложени од страна на грчките доверители.
Претходно во петокот вечерта беше објавено дека грчката влада го отфрлила последниот предлог на доверителите, кој германската канцеларка Ангела Меркел го нарече „великодушен“ .Имено, грчките доверители предложиле петмесечно продолжување на сегашната програма за надворешна финансиска помош до крајот на ноември, во комбинација со финансиската инјекција од 15,5 милијарди евра. За возврат, од Грција бараат да прифати и спроведе реформи за постигнување буџетски заштеди, во прв ред во пензискиот и даночниот систем.
Според Ципрас, овие предлози претставуваат поткопување на суверенитетот на земјата, ќе доведат до намалување на пензиите, платите, зголемување на даноците и се неприфатливи за владата. „Нивната цела беше да се потчинат граѓаните“, рече премиерот на Грција, кој претходно во Брисел ги оцени предлозите како „ултиматум и уцена“.
Според Ципрас, Грците ќе мора да го изразат својот став за планот кој го подготвиле кредиторите за надминување на должничката криза на земјата во замена за реформите, „Тие предлози, кои јасно ги кршат европските правила и правата на вработување, еднаквост и достоинство, покажуваат дека целта на некои наши партнери не е да се постигне договор на сите страни, туку, можеби, целта е да се понижи цел еден народ“, го цитира Reuters грчкиот премиер. „Ние сме обврзани да одговориме на ултиматумите врз основа на суверената волја на народот“, истакна Ципрас.
Поради тоа, грчката влада одлучила да го постави на референдум прашањето – дали се согласувате со предлозите на кредиторите. „Референдумот ќе се одржи во недела, на 5-ти јули. Во сабота ќе се одржи вонредна седница на парламентот“, рече Ципрас.
Додаде дека за тоа ги информирал политичките лидери во земјата, германската канцеларка Ангела Меркел и францускиот претседател Франсоа Оланд, со кои имаше заедничка средба во петокот утрото, пред почетокот на европскиот самит во Брисел.
Ципрас ги повика сите Грци да донесат одговорна одлука „за суверенитетот, независноста, иднината на земјата“.
Според оцената на државниот секретар Никос Папас, народот ќе се изјасни против предлогот на кредиторите. Тој потврди за грчките медиуми дека е планирано да продолжат консултациите со претставниците на ЕК, ЕЦБ и ММФ. Ципрас, исто така, рече дека ќе побара на неколку дена да биде одложена исплатата на јунскиот долг кон ММФ од 1,6 милијарди евра, чиј рок истекува на 30-ти јуни./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
„Во семејството не смее да постои ниту една тајна, верувам дека детето е со некого и дека не е надвор“: Јуриќ за случајот со исчезнатата Данка
Основачот на Центарот за исчезнати и малтретирани деца, Игор Јуриќ, учествувајќи во емисија во живо, кажа нови детали од истрагата за случајот со исчезнатата Данка Илиќ објаснувајќи зошто потрагата на терен била прекината по 27 часа.
„Не, тоа апсолутно не значи дека некои работи се откриени, напротив, значи само дека нема потреба да се троши работна сила и да се насочува енергија кон тој дел од теренот, кој е целосно и темелно прегледан. Штом немаме дополнителни информации, истрагата продолжува, сега истрагата тргна во друга насока и се вршат некои оперативни дејства поврзани со сознанијата за самото девојче“, изјави Јуриќ.
Тој вели дека во случаите на исчезнување на детето родителите мора да споделат сè со полицијата, дури и најинтимните семејни тајни, кои може да бидат важни во тие моменти.
„Кога зборуваме за овие ситуации, кога детето ќе исчезне, едноставно, не смее да има никакви тајни во семејните односи, напротив, треба целосно да ѝ помогнете на полицијата. Ако имате каква било ситуација што може да доведе до несакан настан, во случајот исчезнување мало девојче, мора да кажете сè што знаете“.
Основачот на Центарот за исчезнати и малтретирани деца вели дека во деновите кога не знаеле каде е ќерка му Тијана Јуриќ посакувал некој да излезе и да побара откуп.
„Навистина верувам и го чекам соопштението на полицијата за да видам кое е конечното решение за оваа драма, но, дефинитивно, бев среќен што детето не беше пронајдено на тој простор, особено таа прва вечер бидејќи тешко дека детето може да преживеало таму во тие услови. Кога исчезна Тијана, се надевавме дека некој ќе ни побара откуп и дека е жртва на киднапирање, некако сега се надевам дека има шанси детето поради некоја причина да е со некои луѓе и да е уште живо. Таа надеж постои во нашите глави, но од нашето искуство мораме да бидеме подготвени за најлошите вести.
Според него, добро е што е пребарана областа и последната надеж е дека некој е вмешан и дека детето е скриено поради некоја причина.
„Сега очекувам дека оперативците на МУП ќе завршат добра работа и дека, конечно, ќе ја дознаеме вистинската вистина.
Игор Јуриќ зборуваше и за активирање на системот „Најди ме“.
„Системот го активираат началниците на полициските одделенија, во случајот тоа беше полициското одделение каде што детето исчезна. Кога ќе се процени дека детето е во опасност, системот се активира. Она што беше специфично во овој случај е дека детето е екстремно мало, самите околности беа многу чудни и полицијата бргу реагира и поради возраста на детето, темелно го пребара теренот.
„Полицијата се погрижила да не го загрози дополнително животот на детето и да ги истражи сите околности, детето да не биде жртва на киднапирање, да не се бара откуп и слично, затоа системот бил активиран околу 7 часот“, објаснува тој.
Регион
Полицајци и пожарникари пристигнуваат пред куќата каде што исчезна Данка
Во Бањско Поле во Србија пристигнуваат уште полициски сили и пожарникари во околината на викендичката на семејството Илиќ во близина на која последен пат била видена малата Данка Илиќ по која веќе трет ден се трага.
Покрај пожарникари и полиција, на самото место има и багер, иако сè уште нема официјални информации зошто. Репортерот на српски „Телеграф“ јавува дека полицијата отвора шахти околу куќата на семејството Илиќ.
Како што објави „Телеграф“, полицијата и работниците од ЈКП од утрово го расчистуваат теренот.
Данка Илиќ исчезна во вторникот во 13.45 часот кога мајка ѝ му давала вода на другото дете.
По девојчето 27 часа трагаа припадници на жандармеријата, полицијата, пожарникари, спасувачи, како и многубројни мештани. По 27 часа, српската полиција го прекина пребарувањето на теренот во Бањско Поле.
Регион
Кризата во Бугарија продолжува: никој не може да формира влада, на повидок се нови избори
Претставниците на партијата Има таков народ, денеска, на бугарскиот претседател Румен Радев му го вратија третиот и последен мандат за состав на влада, со што се отвора патот за закажување вонредни парламентарна избори.
Мандатот што ѝ беше врачен на ИТН беше последна шанса за формирање редовна влада во рамките на сегашното Народно собрание, јавува Бугарското радио. Претседателот Радев сега треба да го одреди датумот на предвремените избори за парламентот откога неисполнети му беа вратени трите мандати за формирање влада.
На изборите во април минатата година ГЕРБ освои 69 пратенички мандати, коалицијата предводена од партијата Продолжуваме со промените освои 64 од вкупно 240 места во бугарскиот парламент, а нивните обиди за формирање влада претходно беа неуспешни.
Првиот мандат Радев ѝ го довери на коалицијата ГЕРБ-СДС, но таа не формира влада, мандатарката Марија Габриел се откажа и го врати мандатот.
Вториот мандат за состав на влада му беше доверен на Николај Денков.
Третиот мандат за состав на влада, според бугарскиот Устав, претседателот го доверува на една од другите парламентарни сили, по негова дискреција, во рок од 7 дена. Според Уставот, доколку не се постигне договор за формирање влада, претседателот по консултација со пратеничките групи назначува преодна влада и распишува нови предвремени избори во рок од 2 месеца.