Регион
Грчката полиција употреби солзавец против демонстрантите во Атина
Грчката полиција употреби во петокот солзавец во судирот со земјоделците кои огорчени од реформите во пензискиот систем ја каменуваа зградата на министерството за земјоделие во центарот на Атина, во пресрет на големите протести кои се очекуваат подоцна во текот на денот.
Со реформите на пензискиот фонд за трипати во следните четири години ќе бидат зголемени издвојувањата за здравственото пензиското осигурување. Овој потег е дел од пошироките реформи со кој грчкиот пензиски систем во 2016 година треба да заштеди околу 1,8 милијарди евра и е клучен услов за исплата на третиот пакет финансиска помош во износ од дополнителни 86 милијарди ера во согласност со договорот што владата во Атина го потпиша со меѓународните доверители
Земјоделците од цела Грција се упатија кон престолнината Атина за да ја искажат својата огорченост поради плановите на владата на радикалната левица Сириза, за зголемување на придонесите за пензиите и даноците.
Околу 800 земјоделци од Крит, најголемиот грчки остров, се судрија со полицијата којашто ја обезбедуваше зградата на министерството за земјоделие. Демонстрантите фрлаа камења и ги испокршија прозорците на објектот, пренесуваат медиумите.
„Земјоделците се обидоа да ја потиснат полицијата пред влезот во министерството. Полицијата фрли солзавец за да ги запре“, изјавил за Reuters неименуван полициски функционер.
Во петокот попладне во Атина земјоделците ќе протестираат против пензиските реформи. Во моментов грчките фармери уживаат пофлексибилен режим од другите приватници и од крајот на јануари и блокираат патиштата низ целата земја, а последните десет дена целосно се блокирани транспортите на стоки на границите кон Турција, Бугарија и повремено кон Македонија.
Од вторникот, по блокадата на бугарските возачи на камиони и заканата од Бугарија дека ќе покрене постапка во Европската унија, грчките земјоделци ја укинаа блокадата и ги пропуштаат камионите со стока на неколку часа на ден на грчко-бугарскиот граничен премин Промахон/Кулата.
Грчкиот премиер Алексис Ципрас во средата повика на дијалог, меѓутоа ја исклучи можноста да бидат повлечени предлог реформите на пензискиот систем./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.