Регион
Исламската држава повикува на освојување на Истанбул
Маскиран џихадист кој се претставува како припадник на радикалната сунитска организација Исламска држава ги повика во видео порака Турците да се кренат против „неверникот“ претседателoт Реџеп Тајип Ердоган и да помогнат во освојувањето на Истанбул.
Турција е во состојба на зголемена безбедносна подготвеност откако кон крајот на јули ја започна „синхронизираната“ операција против терористичките организации, во кои се вклучени воздушни напади врз позициите на Исламската дражва во Сирија, односно овозможување на американските авион за оваа цел да ги користат турските воени бази, како и напади врз позициите на забранетата Работничка партија на Курдистан (PKK) во северен Ирак. Истовремено, турската полиција и разузнавачките служби ширум државата речиси секојдневно спроведуваат апсења на припадници на радикални исламистички и политички групации, кои се осомничени за подготовка на терористички напади.
Ваквите активности на Анкара се оценуваат како голем пресврт во нејзиното однесување кон Исламската држава, бидејќи Турција од сојузниците беше критикувана дека не презема мерки за да го спречи префрлувањето преку нејзината територија на борци оружје за џихадистите во Сирија. Турските власти долго време не носеа одлука за преземање подрастични мерки, но откако на 20-ти јули млад Турчин припадник на Исламската држава изведе самоубиствен смртоносен напад во пограничниот град Суруч во кој беа убиени 34 курдски активисти, Анкара се одлучи за „отворање фронт против тероризмот“.
Маскираниот борец, како што истакнуваат турските медиуми, на беспрекорен турски јазик со повремено рецитирање од Куранот на ајети (стихови) и молитви на арапски јазик, во споменатата видео порака го обвинува претседателот Реџеп Тајип Ердоган дека „им ја продал земјата на крстоносците“, и им дозволил на Американците да ги користат турските воздухопловни бази за напади врз Исламската држава, само за да се задржи на позицијата.
Претходно џихадистот им се обраќа на Турците „коишто пред векови го примиле исламот“ и жали „што некои од нас започнаа да се поклонуваат на гробници“, што во своето ригидно сфаќање на исламот Исламската држава го смета за идолопоклонство и богохулство, и притоа тоа се илустрира со снимка на посета на Ердоган на џамија.
„Тогаш дојде секуларистот (Мустафа) Кемал Ататурк. Тој го принуди турскиот народ да се откаже од својата вера, наметнувајќи го секуларизмот“, додава маскираниот милитант и продолжува „Тогаш дојде предавникот Ердоган… Тој ги отфрли божјите закони. Тој се спријатели со Американците, Евреите, крстоносците, атеистите на Ататурк, и отпаднатите шпиони на семејството Сауд“, се вели уште во пораката
„Турски народе морате неотповикливо да се кренете против тие атеисти, неверници и крстоносци кои ве поробија“, изговара милитантот кој не се претставува со никакво име во видеото, зад кого стојат двајца вооружени брадести мажи со турбани на главите. Меѓутоа, забележливо е што во пораката нема конкретни закани.
Турските медиуми притоа толкуваат дека термините „атеисти“ и „неверници“се однесуваат на Работничката партија на Курдистан (PKK) и на Слободната сириска армија (FSA), којашто официјална Анкара ја поддржува во борбата против сирискиот претседател Башар ал-Асад и на нејзиното водство му дава прибежиште на турска територија, главно во Истанбул.
Агенцијата Reuters не добила потврда за автентичноста на снимката датирана со 17-ти август (понеделникот), ниту од турските, ниту од западните разузнавачки служби. Американскиот разузнавачки интернет ресурс SITE, кој ја следи активноста на исламските екстремисти, го опиша видеото како повик на турските борци во Исламската држава до сонародниците муслимани на вооружен бунт.
Видеото беше емитувано на речиси сите турски медиуми. Неговиот наслов е „Порака за Турција“, а како производител се потпишува „државното биро за медиумите Рака“, односно референца за овој град во истоимената покраина во Сирија, кој Исламската држава го прогласи за престолнина на нејзиниот „калифат“ прогласен на териториите во Сирија и во Ирак.
„Заедно, под командата на Абу Бакр ал-Багдади, да го освоиме Истанбул“, се заклучува во пораката на Исламската држава. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Европскиот парламент одобри визна либерализација за Србите од Косово
Европскиот парламент денеска одобри визна либерализација за имателите на српски пасоши од Косово, кои ги издава Координативната управа на Србија на предлог на европратеникот и известувач за укинување на тие визи, Матјаж Немец.
За извештајот на Немец гласале 406 од 597 европратеници, 97 биле против, а 94 биле воздржани.
По гласањето во ЕП, последниот збор за овој предлог треба да го дадат министрите на Советот на ЕУ.
Претходно овој месец, амбасадорите на земјите членки на ЕУ се согласија со предлогот на ЕП и Советот на ЕУ за измена на регулативата за иматели на српски пасоши издадена од Координативната управа на Србија, со која се доделува визна либерализација на носителите на овие пасоши, пишува српската новинска агенција „Танјуг“.
Претходно, Комитетот за граѓански слободи, правда и внатрешни работи на ЕП на 9 април го усвои нацрт-извештајот за визна либерализација.
Целиот Западен Балкан ќе има ист визен режим за патување во ЕУ
Оваа одлука гарантира целиот регион на Западен Балкан да има ист визен режим за патување во ЕУ, објави тогаш ЕП.
Постои можност одлуката за визна либерализација за имателите на српски пасоши во Косово да почне да се применува до почетокот на летото.
Србите од Косово се единствените од Балканот на кои им е потребна виза за ЕУ
Србите од Косово и Метохија, кои поседуваат пасоши издадени од Координативната управа, која функционира во рамките на Министерството за внатрешни работи на Србија, се единствените на кои им е потребна виза за влез во земјите на ЕУ откога од 1 јануари годинава беа укинати визите за граѓаните на Косово.
Во ноември 2023 година Европската комисија предложи да почне постапка за вклучување на граѓаните на Косово, кои имаат пасоши издадени од Координативната управа на Србија, преку визна либерализација.
Регион
Додик повторно во Русија: Имаме притисок, но остануваме посветени на добрите односи со Москва
Лидерот на босанските Срби, Милорад Додик, повторно отпатува во Русија за да ја изрази својата желба за зајакнување на односите со режимот на Владимир Путин, а денеска на средбата со шефот на рускиот Совет за безбедност, Николај Патрушев, тоа го потврди. Додик отпатува за Санкт Петербург, каде што ќе учествува на меѓународниот безбедносен форум организиран од руските власти, а таму го однесе и министерот за безбедност на БиХ, Ненад Нешиќ, со чија партија е во коалиција на државно ниво.
Како што објави јавниот сервис на Република Српска (РТРС), Додик веднаш се сретнал со Патрушев, кој се смета дека е еден од најблиските соработници на Путин. Двајцата разговараа за соработката меѓу РС и Русија, а Патрушев особено ги пофали добрите лични односи меѓу Додик и Путин.
„Вашите одлични лични односи со претседателот на Русија, Владимир Путин, водат до одлични односи меѓу РС и Руската Федерација“, рече Патрушев на средбата додавајќи дека е свесен оти РС е под голем притисок поради тоа.
Додик одговори дека нема да го поколебаат притисоците.
„Ние сме под голем притисок, но остануваме посветени на добрите односи со Русија“, рече Додик.
Актуелниот претседател на РС, кој е под санкции на САД и Велика Британија, отпатува во Русија во време кога Босна и Херцеговина се соочува со сериозна политичка криза. Министерот за надворешни работи на БиХ, Елмедин Конаковиќ, во понеделникот предупреди дека односите во владејачката коалиција се најлоши досега.
Кризата беше предизвикана од барањето на Додик за укинување на техничките измени на изборниот закон, кои беа наметнати во март од високиот претставник за БиХ, Кристијан Шмит, како и противењето на најавеното усвојување на резолуцијата во Обединетите нации, со која би се прогласил 11 јули како ден за сеќавање на жртвите од геноцидот во Сребреница.
Поради оваа причина, Додик ги актуализира своите закани за независност на РС и тоа го стори во пресрет на заминувањето во Русија.
„Не можеме да живееме со оние што работат против нас. Време е секој да тргне по својот пат“, изјави вчера Додик.
Регион
(Видео) Во Хрватска падна снег
На подрачјето на Горски Котар во Хрватска синоќа падна снег, а на места имаше и вистинска снежна покривка.
Снег ја зафати и горанската делница на автопатот А6 Риека – Загреб, но работниците на зимската служба минаа низ снегот и до утрово нема ограничувања во сообраќајот, јавува Н1.