Регион
Јосиповиќ: Хрватите не се чувствуваат рамноправни во БиХ
Хрватскиот претседател Иво Јосиповиќ изјавил дека во Босна и Херцеговина (БиХ) не постои „хрватско прашање“ туку прашање на рамноправноста на сите три конститутивни народи, а тој се залага и за промена на Уставот на таа земја.
„На ова има право и хрватскиот народ. Очигледно е дека Хрватите не се чувствуваат рамноправно. Целосната рамноправост ќе ја воспостави неопходната рамнотежа, ефикасното функционирање на земјата и здрави односи внатре во БиХ“, изјавил Јосиповиќ за Dnevni avaz.
Тој нагласи дека самите граѓани и народи на БиХ треба да одлучат на кој начин ќе го остварат тоа и додал дека верува во решение кое ќе произлезе од дијалог, меѓусебно разбирање и компромис.
„Оценките се дека е потребно да се постигне целосна рамноправност ги слушнав од најистакнатите политичари, не само од припадниците на хрватскиот народ, туку и од оние кои им припаѓаат на бошњачкиот и српскиот народ“. Повеќепати разговарав и со Бакир Изетбеговиќ (актуелниот претседавач на Претседателството на БиХ) и овие разговори ме охрабруваат“, додал хрватскиот претседател.
Тој навел и дека Европската унија, а со самото тоа и Хрватска, одамна има дефиниран интерес во БиХ, во смисол дека напредокот на земјата е добар за нејзините граѓани, но и за соседите и за ЕУ.
„Стабилна и развиена БиХ е гарант за стабилна и развиена Европа“, рекол Јосиповиќ, нагласувајќи дека постигнувањето на оваа цел мора да се обезбеди преку еднаква перспектива за сите три конститутивни народи на БиХ.
„Тоа може и треба да се постигне преку договор кој ќе ја изрази волјата на сите три народи. Во тој контекст и промената на Уставот е единствената можност“, оценил тој, нагласувајќи дека решението не може да се наметне однадвор, но дека однадвор може да се помогне./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.
Регион
Се вештачат трагите од предметите пронајдени во автомобилот во кој била убиена малата Данка
Телото на малото девојче Данка Илиќ (2), кое на 26 март годинава беше брутално убиено во Бањско Поле, сè уште не е пронајдено.
Осомничениот Дејан Драгијевиќ (50) во Вишото јавно обвинителство во Заечар ги изнесе деталите за убиството на детето. Сепак, тој не сакаше да открие каде го фрлил телото на Данка.
Срѓан Јанковиќ (50) не сакал да зборува за делото, а вчера побарал да му дозволат адвокат по службена должност. Во притвор е и таткото на Дејан Драгијевиќ, кој исто така се бранеше со молчење на обвинувањата дека му помогнал на синот да се ослободи од телото.
Понатамошни чекори во истрагата за „Телеграф.рс“ најавија од Вишото јавно обвинителство во Заечар.
„Вишото јавно обвинителство во Заечар издаде наредба вештаци да ги прегледаат трагите пронајдени во автомобилот на Јавното претпријатие за комунални дејности ‘Водовод’ од Бор“.
Сослушувањата на сведоците се во тек.
Вчера, во Вишото јавно обвинителство во Заечар дадоа исказ Ивана и Милош Илиќ, родителите на убиената Данка.