Регион
Меѓународниот суд на правдата ги отфрли меѓусебните тужби за геноцид на Србија и Хрватска
Меѓународниот суд на правдата (МСП) ги отфрли и тужбата на Хрватска и противтужбата на Србија за извршен геноцид на хрватска територија во периодот од 1991 до 1995 година, пренесува Б92.
Како што навел претседателот на судот, Петр Томка, нити Хрватска нити Србија не успеале да докажат дека другата страна извршила геноцид, па така одбиени се и барањата за отштета.
Во образложувањето на одлуката, Томка навел дека имало намери за насилно иселување на двете групи во делови на хрватската територија, но дека крајната цел не била физичко уништување, што е потребно за делото да се оквалификува како геноцид.
Судот утврдил дека југословенската народна армија (ЈНА) и српските сили извршиле повеќе дела против заштитените групи, но со намера „воено да ги казнат“ или иселат.
„Судот ја одбива тужбата на Хрватска. Хрватска не докажа дека се работи за намерна делумно или целосно да се уништат Хрваттите. Делата кои содржат „актус реус“ геноцид не се извршени со специфична намера, која е потребна за делото да се оквалификува како геноцид“, рекол Томка.
Што се однесува до српската противтужба, Томка навел дека дури и да се докаже дека постоела намера кај хрватските лидери да се избрка српското население од територијата на Хрватска, нема докази дека целта била физичко уништување на населението.
„Поради тоа судот целосно ја отфрла тужбата на Србија“, рекол Томка.
Пресудата на МСП е конечна и обврзувачка за сите членки на ОН и државите имаат обврска да постапат според неа и да не се жалат на истата.
Пресудата за тужбата и противтужбата на Хрватска и Србија била донесена од страна на вкупно 17 судии, 15 постојани судии и двајца ад хок судии од Србија и Хрватска.
За отфрлување на хрватската тужба гласале 15 судии, а одлуката за отфрлувањето на противтужбата била донесена едногласно.
Со изрекувањето на пресудата завршува процесот кој во 1999 година беше покренат од страна на Загреб, тужејќи ги властите во Белград за геноцид кои силите на СФРЈ и СР Југославија наводно го извршиле на хрватска територија.
Србија на ова одговори десет години покасно, поднесувајќи противтужба за геноцид, според која хрватските сили извршиле геноцид над Србите во Книнска Краина, за време и по операцијата „Бура“ во 1995 година.
Во тужбата против Србија, Хрватска тврди дека официјален Белград е одговорен за „етничко чистење“ на хрватските граѓани како „облик на геноцид“, поради тоа што „директно ги контролирал активностите на своите оружени сили, разузнавачките агенти и разни паравоени одреди кои извршиле злосторства на територијата на Хрватска, во регионот на Книн и источна и западна Славонија и Далмација“.
Во противтужбата пак, Србија тврди дека хрватските власти извршиле геноцид за време на операцијата „Бура“, во август 1995 година, во намерата целосно или делумно да се уништат краишките Срби како етничка група. Геноцидот, како што се наведува во противтужбата, бил извршен со убиствата и нанесувањето на сериозни физички и психички повреди на припадниците на српската заедница./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.