Регион
Официјална Тирана: Српските власти да го расчистат инцидентот предизвикан заради лошата организација
Официјална Тирана по инцидентот што се случи во Белград на квалификациската фудбалска средба Србија – Албанија, побара од српските власти да го обелоденат инцидентот, и притоа албанскиот државен врв ги обвинува српските власти за слаба организација на средбата.
Албанскиот министер за внатрешни работи Саимир Тахири во пораката упатена до неговиот српски колега веднаш по инцидентот наведува дека „Српската влада е одговорна за безбедноста и здравјето на играчите. Владата е таа која гарантира безбедност на стадионот“.
Премиерот Еди Рама на социјалните мрежи нагласи дека тој е горд со играта на црвено-црните и притоа оценува дека сè додека имало фудбал, албанската репрезентација победила. Рама инцидентот го оцени како „срамна страна на соседот на фудбалското поле против албанската репрезентација“.
Духовниот лидер на десницата и екс претседател и екс премиер на Албанија Сали Бериша изјави дека „Албанија ги победи варварите“.
Шефот на албанската дипломатија Дитмир Бушати, коментирајќи ги настаните во Белград, истакна дека фудбалот не треба да биде заложник на екстремизмот.
Според албанските медиуми, илјадници навивачи на албанската репрезентација прославуваа до утринските часови.
Новинската агенција balkanweb објави информација повикувајќи се на косовски медиуми, дека знамето на „Етничка Албанија“ на стадионот на Партизан во Белград било подигнато од страна на група на Албанци од Косово кои живеат во Швајцарија. Медиумите исто така наведуваат дека истото знаме, и покрај тоа што било внесено во соблекувалните на албанската репрезентација од еден од играчите, завршило сепак во рацете на главниот делегат на ФИФА.
Албанската федерација информираше дека очекува средбата која беше прекината во Белград да биде регистрирана со резултат 3:0 за Албанија , бидејќи сè што се случило било заради слабата организација на домаќинот. /крај/мн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Силно невреме со поплави во Грција, Волос без струја
Силно невреме ја зафати Грција, поточно Лариса, каде обилните дождови доведоа до излевање на канализацијата, која ги поплави улиците, а во Волос е забележан и прекин на струја.
Врз основа на податоците од метеоролошката станица на Националната опсерваторија во Атина, измерени се просечни 100 милиметри дожд или максимални 312 милиметри на час, поради што полицијата мораше да го прекине сообраќајот бидејќи улиците беа поплавени.
Во градот Волос во текот на ноќта имало проблеми со струјата, но како што пренесуваат грчките медиуми, се е брзо ставено под контрола.
Министерот за цивилна заштита и климатска криза Василис Кикилијас од вчера е во Тесалија за внимателно да го следи развојот на невремето.
– Имаше оправдана загриженост на граѓаните овде во Тесалија бидејќи сеќавањата за катастрофата се свежи, затоа бевме сите овде, координирани и организирани. Драго ми е затоа што досега овој напор се исплатеше. Само со заедничка и координирана работа можеме да добиеме многу добри резултати – најави тој.
Силен дожд и невреме го зафати јужниот дел на Пелион, а како што јавуваат медиумите паднал и град. Овој регион во септември минатата година беше соочен со разорни поплави.
Ненадејна промена на времето се случи и на големите височини во централна и северна Грција, каде падна снег.
„Снежно невреме е забележано во ски-центарот на Василица“, се наведува.
Во меѓувреме, населението е најмногу загрижено за земјиштето околу езерото Карла на границата на Магнезија и Лариса, кои беа поплавени во септември минатата година. Полињата, па дури и воените инсталации во Стефановики се под тони вода.
Регион
Сообраќајка на бугарски автобус во Турција, повредени 11 лица
Единаесет лица се повредени кога автобус со бугарски регистарски таблици што сообраќал од Истанбул за Бугарија се превртел во областа Киркларели во Турција, јави агенција та Анадолија.
Сообраќајната несреќа се случила на 50 километри од бугарската граница. Автобусот е на компанијата „Метро туризам“.
На местото на несреќата се упатени екипи на полиција и медицински лица.
Повредените, вклучувајќи го и возачот на автобусот, се хоспитализирани во околните болници.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.