Партијата Граѓани за европски развој на Бугарија – ГЕРБ на поранешниот премиер Бојко Борисов е победник на предвремените парламентарни избори со освоени 32.6 проценти гласови и е во големо водство пред останатите седум партии што ќе влезат во парламентот, но недоволно сама да формира влада, покажаа првичните резултати од изборите објавени во понеделник.

По објавување на првичните резултати во неделата вечер, според кои ГЕРБ беше во водство, Борисов изјави дека е спремен да преземе секаков ризик во врска со формирањето на новата влада. 

Според 94 проценти обработени гласови ГЕРБ освоила 32.61% проценти од гласовите, Бугарската социјалистичка партија – БСП 15.29%, Движењето за права и слободи ДПС 14.91% од гласовите, покажа резултатите на Државната изборна комисија објавени во понеделник изутрина, пренесува агенцијата BGNES. 

Портпаролот на социјалистите Атанас Мерџанов рекол дека ова е тежок пораз за партијата и смета дека е резултат на разочуварувањето на граѓаните. 

Според овие резултати, Бугарија најверојатно повторно ќе има коалициона влада. 

Бугарите во недела избираа 240 пратеници во Народното собрание од 6.063 кандидати, вклучувајќи ги оние кои истовремено се кандидираа во две изборни единици, а кои ги номинираа 56 политички партии. 

Излезноста на изборите беше под 50 проценти, најмала за последните 25 години откако во Бугарија е сменет комунистичкиот режим. 

Ова ќе биде петта бугарска влада за последните две години, во текот на кои се соочуваше со масовни протести и финансиска криза. 

Борисов вчера рече дека изборите се последна шанса за спас на Бугарија и предупреди дека ако новата влада не биде формирана и повторно се распишат избори, нема да остане ништо што би ја одржало земјата. 

Коалицијата предводена од социјалистите владееше во Бугарија до јули. Борисов беше премиер од 2009 година, до февруари 2013 година кога поднесе оставка поради масовните протести поради сиромаштијата и високите цени на енергенсите. 

На предвремените избори во мај 2013 година ГЕРБ повторно ја однесе победата, но Борисов не успеа да формира влада, па социјалистите и МРФ формираа технократски кабинет на чие чело беше Пламен Орешарски.крај/мф/сд