Регион
Песков: Обвиненијата од Црна Гора е обид да се демонизира Русија
Изјавите кои доаѓаат од страна на црногорските власти во врска со протестите на опозицијата со кои се бара оставка на владата и распишување предвремени избори за наводна руска вмешаност во нив, е обид да се демонизира Русија, изјави во понеделникот портпаролот на Кремљ, Дмитриј Песков, откако црногорскиот премиер Мило Ѓукановиќ претходно во неделата вечерта изјави дека зад протестите во Подгорица стои Москва.
„Насекаде бараат некој ѓавол, и притоа задолжително продолжуваат да ја демонизираат Русија, тоа стана многу добро позната забава за многу земји“, изјави Песков, пренесува агенцијата ТАСС, одговарајќи на барањето на новинарите да ја коментира изјавата на црногорскиот премиер Мило Ѓукановиќ, дека наводно Москва има поврзаност со протестите со коишто се бара неговата оставка.
Подгоричките медиуми црногорската опозиција предводена од Демократскиот фронт ја нарекуваат „просрпска“ и пишуваат дека на протестите биле истакнувани и руски симболи, знамиња и транспарентни против членството на Црна Гора во НАТО.
Портпаролот на Кремљ ова обвинување го нарече „многу чудно“. „Меѓутоа, ние сепак се надеваме дека здравиот разум ќе надвладее и трезвената оцена ќе доминира“, заклучи Песков.
Според последните податоци, по судирот меѓу полицијата и демонстрантите ноќта кон неделата во Подгорица, покрај 40-те повредени и на двете страни, уапсени се уште 11 луѓе, меѓу кои и членови на парламентот од Демократскиот фронт.
Црногорската опозиција бара оставка од премиерот, 53-тригодишниот Мило Ѓукановиќ кој е на власт во Црна Гора без прекин веќе 25 година, а премиер, по шести пат, стана во 2012 година и беше претседател во периодот од 1998 до 2002 година. Бараат и формирање техничка влада која ќе ги распише предвремените парламентарни избори.
Во саботата навечер Демократскиот фронт започна протест на платото пред парламентот, кој според претходниот договор со полицијата требаше да трае до шест часот утрото во недела, на кој побараа од премиерот и спикерот на парламентот, Мило Ѓукановиќ и Ранко Кривокапиќ, да ги исполнат нивните барања да си поднесат оставки и да се формира преодна влада којашто ќе ги организира предвремените парламентарни избори.
Црногорската полиција, којашто минатата седмица насилно го растури протесниот камп пред парламентот, објави дека бил приведен и пратеникот на Демократскиот фронт, Андрија Мандиќ, еден од главните организатори на протестите./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
„Во семејството не смее да постои ниту една тајна, верувам дека детето е со некого и дека не е надвор“: Јуриќ за случајот со исчезнатата Данка
Основачот на Центарот за исчезнати и малтретирани деца, Игор Јуриќ, учествувајќи во емисија во живо, кажа нови детали од истрагата за случајот со исчезнатата Данка Илиќ објаснувајќи зошто потрагата на терен била прекината по 27 часа.
„Не, тоа апсолутно не значи дека некои работи се откриени, напротив, значи само дека нема потреба да се троши работна сила и да се насочува енергија кон тој дел од теренот, кој е целосно и темелно прегледан. Штом немаме дополнителни информации, истрагата продолжува, сега истрагата тргна во друга насока и се вршат некои оперативни дејства поврзани со сознанијата за самото девојче“, изјави Јуриќ.
Тој вели дека во случаите на исчезнување на детето родителите мора да споделат сè со полицијата, дури и најинтимните семејни тајни, кои може да бидат важни во тие моменти.
„Кога зборуваме за овие ситуации, кога детето ќе исчезне, едноставно, не смее да има никакви тајни во семејните односи, напротив, треба целосно да ѝ помогнете на полицијата. Ако имате каква било ситуација што може да доведе до несакан настан, во случајот исчезнување мало девојче, мора да кажете сè што знаете“.
Основачот на Центарот за исчезнати и малтретирани деца вели дека во деновите кога не знаеле каде е ќерка му Тијана Јуриќ посакувал некој да излезе и да побара откуп.
„Навистина верувам и го чекам соопштението на полицијата за да видам кое е конечното решение за оваа драма, но, дефинитивно, бев среќен што детето не беше пронајдено на тој простор, особено таа прва вечер бидејќи тешко дека детето може да преживеало таму во тие услови. Кога исчезна Тијана, се надевавме дека некој ќе ни побара откуп и дека е жртва на киднапирање, некако сега се надевам дека има шанси детето поради некоја причина да е со некои луѓе и да е уште живо. Таа надеж постои во нашите глави, но од нашето искуство мораме да бидеме подготвени за најлошите вести.
Според него, добро е што е пребарана областа и последната надеж е дека некој е вмешан и дека детето е скриено поради некоја причина.
„Сега очекувам дека оперативците на МУП ќе завршат добра работа и дека, конечно, ќе ја дознаеме вистинската вистина.
Игор Јуриќ зборуваше и за активирање на системот „Најди ме“.
„Системот го активираат началниците на полициските одделенија, во случајот тоа беше полициското одделение каде што детето исчезна. Кога ќе се процени дека детето е во опасност, системот се активира. Она што беше специфично во овој случај е дека детето е екстремно мало, самите околности беа многу чудни и полицијата бргу реагира и поради возраста на детето, темелно го пребара теренот.
„Полицијата се погрижила да не го загрози дополнително животот на детето и да ги истражи сите околности, детето да не биде жртва на киднапирање, да не се бара откуп и слично, затоа системот бил активиран околу 7 часот“, објаснува тој.
Регион
Полицајци и пожарникари пристигнуваат пред куќата каде што исчезна Данка
Во Бањско Поле во Србија пристигнуваат уште полициски сили и пожарникари во околината на викендичката на семејството Илиќ во близина на која последен пат била видена малата Данка Илиќ по која веќе трет ден се трага.
Покрај пожарникари и полиција, на самото место има и багер, иако сè уште нема официјални информации зошто. Репортерот на српски „Телеграф“ јавува дека полицијата отвора шахти околу куќата на семејството Илиќ.
Како што објави „Телеграф“, полицијата и работниците од ЈКП од утрово го расчистуваат теренот.
Данка Илиќ исчезна во вторникот во 13.45 часот кога мајка ѝ му давала вода на другото дете.
По девојчето 27 часа трагаа припадници на жандармеријата, полицијата, пожарникари, спасувачи, како и многубројни мештани. По 27 часа, српската полиција го прекина пребарувањето на теренот во Бањско Поле.
Регион
Кризата во Бугарија продолжува: никој не може да формира влада, на повидок се нови избори
Претставниците на партијата Има таков народ, денеска, на бугарскиот претседател Румен Радев му го вратија третиот и последен мандат за состав на влада, со што се отвора патот за закажување вонредни парламентарна избори.
Мандатот што ѝ беше врачен на ИТН беше последна шанса за формирање редовна влада во рамките на сегашното Народно собрание, јавува Бугарското радио. Претседателот Радев сега треба да го одреди датумот на предвремените избори за парламентот откога неисполнети му беа вратени трите мандати за формирање влада.
На изборите во април минатата година ГЕРБ освои 69 пратенички мандати, коалицијата предводена од партијата Продолжуваме со промените освои 64 од вкупно 240 места во бугарскиот парламент, а нивните обиди за формирање влада претходно беа неуспешни.
Првиот мандат Радев ѝ го довери на коалицијата ГЕРБ-СДС, но таа не формира влада, мандатарката Марија Габриел се откажа и го врати мандатот.
Вториот мандат за состав на влада му беше доверен на Николај Денков.
Третиот мандат за состав на влада, според бугарскиот Устав, претседателот го доверува на една од другите парламентарни сили, по негова дискреција, во рок од 7 дена. Според Уставот, доколку не се постигне договор за формирање влада, претседателот по консултација со пратеничките групи назначува преодна влада и распишува нови предвремени избори во рок од 2 месеца.