Пленковиќ: Русија нема да ја запре војната во Украина

Русија не покажува знаци дека ќе ја запре војната во Украина, но е сè порешителна во оваа агресија, изјави хрватскиот премиер Андреј Пленковиќ во Блед.

„За жал, и покрај целата моја добра волја, познавање на Украина и чести контакти со украинското раководство, во моментов не гледам дека Русија ќе ја запре својата агресивна политика“, рече премиерот во Блед. „Напротив, Русија се однесува сè поагресивно во продолжувањето на својата агресија што трае четири и пол години“, изјави Пленковиќ на панелот „Како конвергентните економии создаваат глобални шампиони“.

На дебатата одржана во Бледската школа за менаџмент (IEDC), тој рече дека расположението кон проширувањето на ЕУ во таа алијанса се променило и дека Украина е една од оние што „тропаат на вратата“ на алијансата.

Киев ја забрза реформската агенда, но во рамките на Советот на ЕУ сè уште постои воздржаност околу брзината на тој процес, како и околу идејата Украина да стане полноправна членка на алијансата, продолжи Пленковиќ.

Тој нагласи дека преовладувачката идеја во ЕУ е дека Украина наместо тоа треба да добие посебен статус во алијансата.

Некои европски земји веруваат дека полноправното членство на Украина, земја со население од 40 милиони и која би станала најголема членка на ЕУ по територија, би било преголем товар за европскиот буџет, земјоделските политики и механизмите за донесување одлуки.

Некои земји, исто така, веруваат дека Киев сè уште има многу да направи по прашања како што се борбата против корупцијата, влијанието на олигарсите, транспарентноста и судските реформи. Затоа, се разгледува делумно членство на Украина во ЕУ со преодни периоди за области како што е Заедничката земјоделска политика.

На панелот во Блед, Пленковиќ се осврна и на одлуката на членките на НАТО да издвојат пет проценти од БДП за одбрана – 3,5 проценти директно за воени трошоци и 1,5 проценти за инфраструктура со двојна намена, како што се транспортните коридори.

Одлуката е донесена „повеќе поради агресијата на Путин врз Украина отколку поради притисокот од САД“, рече Пленковиќ, нагласувајќи дека во Европа прашањето за безбедноста досега се земаше здраво за готово, но дека сега ставот на сите европски лидери е дека ова мора да се промени и дека мора да се инвестира повеќе во одбранбените капацитети.