Регион
Полицаец убиен во самоубиствен напад во Истанбул
Еден полицаец кој беше тешко повредени почина во болница по самоубиствен напад што го извршила во вторникот жена која зборувала англиски во туристичкиот центар на Истанбул, една седмица по нападот за кој одговорноста ја презема екстремна левичарска група. Во истиот напад е повреден полесно уште еден турски полицаец.
Инцидентот се одиграл на плоштадот Султанахмет во историскиот центар на градот, едно од најпопуларните туристички места во Истанбул каде што се наоѓа Сината џамија. Жената облечена во наметка го активирала експлозивот што го носела на себе, пренесува телевизијата NTV, според која бомбашката „предвреме се кренала во воздух пред се влезе во полициска станица, откако била спречена да влезе од страна на стражарите“.
Гувернерот на Истанбул, Васиф Шахин, изјави дека бомбашот самоубиец се преправала како турист, обраќајќи им се на полицајците на англиски, велејќи дека го заборавила својот паричник во станицата обидувајќи се да влезе во објектот само миг пред експлозијата.
Телото на неидентификуваната бомбашка е подигнато, а другите повредени се хоспитализирани. На местото на нападот е запрен сообраќајот и целосно е евакуиран плоштадот, пренесува весникот Hurriyet.
Полицијата се сомнева дека и зад овој напад стои забранетата екстремна левичарска партија Револуционерна народноослободителна партија/Фронт (DHKP/C). Оваа група ја презема одговорноста за неуспешниот нападот со гранати 1-ви јануари врз полицајците кои го обезбедуваат отоманскиот комплекс Долмабахчи во чија близина се наоѓа резиденцијата на премиерот Ахемт Давутоглу.
Последните години DHKP-C изведе низа напади врз владини објекти. Во февруари 2013 година ја презема одговорноста за самоубиствениот бомбашки напад врз амбасадата на САД во Анкара во кој загина припадник на обезбедувањето, турски државјанин./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Таткото на осомничениот за убиството на Данка Илиќ го откажал полномошното на адвокатот
Небојша Живановиќ, адвокатот на Радослав Д., таткото на Дејан Д., кој е осомничен за убиството на двегодишното девојче Данка Илиќ, за Танјуг изјави дека неговиот клиент го откажал полномошното.
Радослав Д. е осомничен дека му помогнал на својот син да го премести телото на девојчето од депонијата на засега непозната локација.
Со оглед на тоа што го откажал полномошното на избраниот бранител, сега треба да му се определи бранител по службена должност на Радослав Д.
Биолошкиот брат на осомничениот Дејан Д., Далибор Д., почина на 7 април во Полициската станица во Бор, каде беше осомничен дека му помогнал на својот брат да го скрие телото на двегодишното девојче.
Двегодишната Данка Илиќ исчезна на 26 март во Бањско поле кај Бор, а полицијата по 10-дневна потрага и детални проверки и информации ги уапси Срѓан Ј. и Драган Д. од Бор, кои се осомничени дека го удриле девојчето со автомобил, а потоа нејзиното тело го ставиле во багажникот на автомобилот и го однеле на депонија.
Телото на девојчето се уште не е пронајдено.
Регион
Никола Роквиќ тргна пеш на пат долг 1.150 километри на хумана мисија
Никола Роквиќ пеш тргна кон Грција и треба да помине 1.150 километри, а сето тоа во хуманитарна мисија.
Тој и неговата сопруга Бојана неодамна ја основаа „Фондација за семејство“, а за да им помогне на оние на кои им е потребна помош, реши да направи неверојатен чекор достоен за восхит.
Треба да стигне до Егина, каде што ќе се поклони на Свети Нектариј Егински. Пред заминувањето тој со семејството ја посети црквата Свети Сава каде се помоли.
„По овој пат решив да тргнам од љубов кон луѓето и се надевам дека ќе биде за радост на многумина, се надевам дека ќе биде за радост на многумина, се надевам дека ќе биде за помош на многумина. Првенствено да помогнам на многу семејства, на многу деца, но најважно да им помогнам на болните деца, поради што во голема мера го започнав ова патување. Започнавме фондација која ќе му помага на семејството, која ќе помага на талентирани деца, на многудетно семејство, но и на болни деца“, изјави Никола во храмот Свети Сава за „Телеграф“.
Никола последниве месеци се подготвуваше за овој потфат со големи планинарски тури.
Регион
Европскиот парламент одобри визна либерализација за Србите од Косово
Европскиот парламент денеска одобри визна либерализација за имателите на српски пасоши од Косово, кои ги издава Координативната управа на Србија на предлог на европратеникот и известувач за укинување на тие визи, Матјаж Немец.
За извештајот на Немец гласале 406 од 597 европратеници, 97 биле против, а 94 биле воздржани.
По гласањето во ЕП, последниот збор за овој предлог треба да го дадат министрите на Советот на ЕУ.
Претходно овој месец, амбасадорите на земјите членки на ЕУ се согласија со предлогот на ЕП и Советот на ЕУ за измена на регулативата за иматели на српски пасоши издадена од Координативната управа на Србија, со која се доделува визна либерализација на носителите на овие пасоши, пишува српската новинска агенција „Танјуг“.
Претходно, Комитетот за граѓански слободи, правда и внатрешни работи на ЕП на 9 април го усвои нацрт-извештајот за визна либерализација.
Целиот Западен Балкан ќе има ист визен режим за патување во ЕУ
Оваа одлука гарантира целиот регион на Западен Балкан да има ист визен режим за патување во ЕУ, објави тогаш ЕП.
Постои можност одлуката за визна либерализација за имателите на српски пасоши во Косово да почне да се применува до почетокот на летото.
Србите од Косово се единствените од Балканот на кои им е потребна виза за ЕУ
Србите од Косово и Метохија, кои поседуваат пасоши издадени од Координативната управа, која функционира во рамките на Министерството за внатрешни работи на Србија, се единствените на кои им е потребна виза за влез во земјите на ЕУ откога од 1 јануари годинава беа укинати визите за граѓаните на Косово.
Во ноември 2023 година Европската комисија предложи да почне постапка за вклучување на граѓаните на Косово, кои имаат пасоши издадени од Координативната управа на Србија, преку визна либерализација.