Регион
Политико Јуроп: Хулигани го водат Косово
Хашим Тачи и неговите луѓе од Косово создадоа мафијашка држава, а сега се обидуваат да го спречат формирањето на специјалниот суд за воени злосторства. Ова меѓу другото се наведува во текстот кој под наслов „Хулигани го предводат Косово“, го објави „Политико Јуроп“.
Инаку „Политико Јуроп“ е бриселски информативен портал основан од американскиот „Политико“ и германскиот „Аксел Шпрингер“.
Текстот е потпишан од американскиот новинар со хрватско-ирско потекло Чак Судетиќ, кој во кариерата најмногу пишувал за војните на просторите на поранешна Југославија и за војните во Заливот. Исто така Судетиќ бил соавтор на мемоарите на поранешната обвинителка на Трибуналот во Хаг, Карла дел Понте, а неговата книга за Сребреница беше меѓународен бестселер.
Судетиќ пишува за „Вашингтон Пост“, „Економист“, „Ролинг Стоун“ и „Атлантик мантли“.
Повод за текстот на Судетиќ е тоа што Приштина и покрај притисоците од Европската унија и САД со месеци одбива да ги усвои прописите кои ќе овозможат формирање на Специјалниот суд кој ќе ги истражува воените злосторстава направени од поранешната ОВК.
Новинарот, повикувајќи се на дипломатски извори, пишува дека Косово ќе се соочи со сериозни последици во односите на Америка и Европа, а како главен виновник го посочува Тачи. Како што се наведува, Тачи и останатите од косовската политичка елита во западните разузнавачи извештаи се наведени како „преставници на организиран криминал“ и дека тие ги жртвуваат интересите на Косово само за да се заштитат себеси од кривично гонење.
Во текстот, новинарот пишува дека западните дипломати во Приштина не веруваат дека Тачи е искрен кога вели дека го поддржува формирањето на Специјалниот суд. Западните дипломати шпекулираат дека поддршката на Тачи за формирање на судот е само „политички театар“ и дека тој работи зад сцената што подолго да го одложи неговото формирање.
Покрај Тачи и неговата партија против формирање на Специјалниот суд е и Рамуш Харадинај и неговата партија. Поради тоа, во дипломатските кругови во Приштина се поставува прашањето дали тие стравуваат дека ќе бидат уапсени, дека ќе им биде судено и дека ќе им бидат определени повеќегодишни затворски казни.
Во текстот се пренесува изјава на еден американски амбасадор дека „тажен е фактот што САД и земјите од ЕУ уште пред десет години знаеле дека Тачи и неговите луѓе се вмешани во трговија со дрога и формирање на мафијашка држава“.
На ова тема некои западни дипломати рекле дека неодамнешните вооружени судири помеѓу терористите од ОВК и специјалните полициски сили на Македонија во Куманово, како и порастот на илегалните мигранти во февруари од Косово кон земјите од ЕУ, преставуваат закана за Европската унија од косовското политичко подземје каков хаос можат да предизвикаат доколку Брисел не престане да притиска со барањето за формирање на Специјалниот суд, пишува „Политико Јуриоп“. крај/мф
Извор: politico.eu
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Додик не го признава геноцидот во Сребреница: „Ќе однесеме цвеќе, ако не навредува никого“
Во четвртокот, лидерот на Србија во Босна и Херцеговина, Милорад Додик, изрази подготвеност да го посети Меморијалниот центар Поточари во Сребреница и да положи цвеќе на заедничкиот споменик подигнат во спомен на масакрот на Бошњаците за време на војната, но тој повторно негираше дека таму имало геноцид.
Во интервју за новинската агенција на Република Српска, претседателот Додик најави дека владата и целото раководство на овој ентитет ќе заседаваат во Сребреница на 2 мај 2024 година, кога ќе се одржи дискусија пред Обединетите нации и се очекува гласање за Резолуција за осуда на геноцидот во тој град во летото 1995 година.
Резолуцијата е поддржана од дваесет земји, меѓу кои САД, Обединетото Кралство и Германија и се очекува нејзино усвојување. Целта е да се интернационализираат страдањата на Бошњаците во Сребреница.
Водечките српски претставници од Белград и Бања Лука, претседателите Александар Вучиќ и Милорад Додик, тврдат дека ова е обид да се префрли вината на српскиот народ.
„Република Српска нема да ја прифати резолуцијата за Сребреница за која ќе се одлучува во Генералното собрание на ОН бидејќи се што е напишано во неа е лага. Босна и Херцеговина не може да живее врз основа на тоа дека едната нација во неа е оквалификувана како геноцидна“, рече Додик.
Сепак, тој изрази подготвеност да им оддаде почит на жртвите од масакрот во Сребреница.
„Ако ни се укаже можност, на 2 мај ќе однесеме венци во Поточари, ако тоа не навреди никого. Не се плашам дека би можел да завршам како Вучиќ, кој дојде да им оддаде почит на жртвите, изрази сочувство, а доби камен во главата и никој не одговараше за тоа“, истакна Додик.
Тој смета дека Резолуцијата за Сребреница сепак нема да го добие потребното мнозинство на седницата на Генералното собрание на ОН.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.