Регион
Путин и Ердоган договорија лична средба
Претседателите на Турција и на Русија, Реџеп Тајип Ердоган и Владимир Путин во текот на телефонскиот разговор договорија да се сретнат лично, објави во средата службата за односи со јавноста на турскиот челник, а телевизијата Habertürk повикувајќи се на извори во кабинетот на Ердоган ја пренесува оцената дека разговорот минал „многу позитивно“.
Наскоро се очекуваат официјалните соопштенија за содржината на разговорот од кабинетите на двајцата челници.
Повикот на иницијатива на рускиот претседател Владимир Путин е одговор на писмото што во понеделникот му го упати неговиот турски колега по должност Реџеп Тајип Ердоган, во кое се извинува за соборувањето на рускиот борбен авион и убиството на рускиот пилот кон крајот на ланскиот ноември на сириско-турската граница.
Денешниот разговор меѓу Путин и Ердоган е првиот директен контакт меѓу нив по ноември 2015 година.
Последен пат Путин и Ердоган имаа лична средба минатиот ноември на маргините од самитот на Г20 во турска Анталија, само неколку дена пред инцидентот со рускиот бомбардер. Тие денови Ердоган изјави дека неколкупати се обидувал да му се јави телефонски на Путин, но овој не одговарал на повиците.
Путин во текот на разговорот на Ердоган му изразил сочувство по повод терористичкиот напад во истанбулскиот аеродром „Кемал Ататурк“ во кој според последните информации убиени се 41 човек а уште 230 други се ранети.
Во разговорот, исто така, станало збор за нормализацијата на односите меѓу двете земји и била истакната важноста на билатералната соработка, се наведува во кусата објава на администрацијата на турскиот претседател.
Турската телевизија NTV, повикувајќи се на сопствени неименувани извори, објави дека разговорот на двајцата претседатела траел околу четириесетина минути и биле „продуктивни и позитивни“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сообраќајка на бугарски автобус во Турција, повредени 11 лица
Единаесет лица се повредени кога автобус со бугарски регистарски таблици што сообраќал од Истанбул за Бугарија се превртел во областа Киркларели во Турција, јави агенција та Анадолија.
Сообраќајната несреќа се случила на 50 километри од бугарската граница. Автобусот е на компанијата „Метро туризам“.
На местото на несреќата се упатени екипи на полиција и медицински лица.
Повредените, вклучувајќи го и возачот на автобусот, се хоспитализирани во околните болници.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.