Регион
Рогозин најави руска помош за Србија во испораки на оружје
Рускиот вицепремиер Дмитриј Рогозин изјави во понеделникот во Белград дека Русија ќе го разгледа повикот на Србија за испорака во вооружување и системите за противвоздушна одбрана С-300 и ќе настојува да ја поддржи Србија.
„Ќе сториме сé да осигуриме поддршка за нашиот сојузник на Балканот“, изјави рускиот вицепремиер Дмитриј Рогозин на прес-конференцијата со српскиот премиер Александар Вучиќ.
Рогозин истакна дела руската комисија внимателно ќе го проучи повикот на српската страна за испорака на ефикасно вооружување од „неофанзивен карактер“, кое ќе служи за одбрана на земјата, а на Вучиќ му подари макета од системот за противвоздушна одбрана С-300.
На прашањето од новинарите до Вучиќ за системите С-300, српскиот премиер одговори дека тој систем е „прескап“ за Србија, но дека руската страна покажала желба да помогне низ одредени ангажмани. Оцени притоа дека претстојат „месеци и години разговори за тоа“.
Вучиќ порача дека Србија никому нема да му биде лесна цел, и оти за тоа работи на јакнење на сопствените воени капацитети и домашната воена индустрија, истакнувајќи дека земјата е определена за мирот и за целосна стабилност во регионот, како и за најдобри односи со сите соседи.
„Никогаш никого Србија нема да нападне, меѓутоа мора да биде во состојба во секој момент да ја заштити својата територија и граѓаните“, додаде Вучиќ истакнувајќи дека Србија молчи „на заканите на оние коишто не се откажуваат од набавките на многу моќно офанзивно оружје“, во контекстот на изјавите кои деновиве беа разменети на релацијата Белград – Загреб, во врска со хрватското набавување на оружје.
„Јас не сум нервозен, туку загрижен. Балистичките ракети и лансирните рампи кои се планираат да се набават во Хрватска имаат дострел од 300 и 350 километри. Можете од Загреб, или од кое и да е друго место да гаѓате некое место во централна Србија“, одговори Вучиќ на новинарско барање да ги коментира изјавите на хрватскиот министер за одбрана Анте Котромановиќ, кој неодамна изјави дека Србија нема причини за загриженост поради вооружувањето на Хрватска.
Укажувајќи на фактот дека Србија е воено блоковски неутрална, додека истовремено неколку земји во опкружувањето се дел од НАТО, Вучиќ изјави дека „не гледа потреба“ од набавување офанзивно оружје.
Теми на разговорите меѓу Вучиќ и Рогозин во Белград во понеделникот беа и економската соработка и туризмот, како и можниот извоз на автомобилите „Фиат 500 л“, кои се произведуваат во Крагуевац. Вучиќ го замоли Рогозин, да посредуваат кај властите во Казахстан, бидејќи оваа земја потенцијален купувач на производите од автомобилската индустрија во Србија.
Притоа рускиот вицепремиер, кој имаше одвоени седби и си српскиот претседател Томислав Николиќ и со шефот на дипломатијата Ивица Дачиќ, рече дека има простор за зголемување на соработката во земјоделието и во градежништвото, како и во ткн верски туризам./крај/мф/сн
Извор: Tanjug
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.