Регион
Рогозин: Проширувањето на НАТО на Балканот е опасен процес
Русија има негативен став за проширувањето на НАТО на Балканот и смета дека тоа е предизвикувачки процес, изјави рускиот вицепремиер Дмитриј Рогозин во интервју за српскиот весник Политика.
Според Рогозин, проширувањето на НАТО со Црна Гора и можноста кон Македонија отвора неколку сериозни прашања. „Ние му пристапуваме на овој процес со недоверба и мораме да реагираме“, вели рускиот политичар.
Тој, исто така, додава дека Русија не гледа со оптимизам на обидите за милитаризација на Балканот. Коментирајќи го тоа што Хрватска се вооружува со балистички ракети, Рогозин потенцира дека Русија „се залага тоа што се случило за време на деведесетите години (од минатиот век) никогаш да не се повтори“, но и дека не ѝ сеедно кога се работи за безбедноста „на својот пријател Србија“.
Рогозин додава дека на Русија по падот на Берлинскиот ѕид ѝ биле ветувани повеќе работи, меѓу кои и дека обединета Германија ќе биде неутрална и дека НАТО нема да се движи кон истокот.
„Сите тие тези беа лаги. Словенија и Хрватска неодамна станаа дел од ЕУ и НАТО со објаснување дека тоа ќе придонесе за засилување на безбедноста на регионот. Уште еднаш го чувствувам целиот цинизам на политиката на НАТО. Кога викаат дека НАТО ќе донесе мир и безбедност во Европа, јас одлучно кажувам дека не верувам во тоа“, порачува рускиот политичар./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Завршено вештачењето на мобилниот телефон на мајката на Данка, биле бришени пораки и повици, објавија српските медиуми
Мобилниот телефон на мајката на Данка Илиќ бил испратен на вештачење по исчезнувањето на девојчето. Неофицијалните податоци говорат дека мајката избришала многу пораки и повици ден пред и на денот на исчезнувањето на Данка, објави српски „Блиц“.
Според неофицијални сознанија од истрагата, вештачењето на мобилниот телефон на Ивана Илиќ покажало дека се избришани многу пораки и податоци за повици, пишува српски „Информер“.
„На ден пред исчезнувањето и на денот на исчезнувањето на Данка Илиќ многу пораки и повици се избришани од телефонот. Ова го утврдиле инспекторите за високотехнолошки криминал. Пораките и повиците може да се избришат од телефонот, но да останат во базата на податоци“, рекол изворот.
Како што се дознава, пред исчезнувањето на Данка Илиќ мајката трипати го фотографирала детето од разни агли.
Да потсетиме, мајката на Данка Илиќ, Ивана, денеска повторно е во полициската станица во Бор, каде што е на распит за околностите на својата исчезната ќерка. Таткото помина на полиграфското тестирање.
Регион
„Клучот е кај родителите, тие мора да одговорат на едно прашање“, вели поранешен шеф на белградската полиција за случајот со исчезнувањето на Данка
Родителите се тие што имаат многу да објаснат. Прво, зошто чекаа да го пријават исчезнувањето? Колку што знам, чекаа два часа. Познато е дека кога ќе исчезне дете, веднаш се пријавува за да се реагира бргу, изјави Марко Ницовиќ, поранешен началник на белградската полиција, за „Телеграф.рс“.
Според Ницовиќ, полицијата оди во добра насока бидејќи ја проверува секоја педа од земјата, но се надеваат и дека темелно се проверуваат граничните премини бидејќи не ја исклучуваат можноста за киднапирање.
„Би можело да биде сè, не е исклучена никаква можност. Ако мајката рече дека го оставила девојчето на минута, го поставуваме прашањето каде би можело да оди двегодишното дете? Колку далеку, без мајка му да го најде? Второ, зошто чекаа два часа? Има простор и за киднапирање, а знаеме дека границата е блиску, но и за многу повеќе. Отворени се многу прашања и останува да се почека истражните органи да си ја завршат работата“, вели Ницовиќ за српски „Телеграф“.
Да потсетиме, потрагата по двегодишната Данка Илиќ влезе во четвртиот ден. Во потрагата од утрово се вклучени уште 18 пожарникари и кучето Зиги.
Багери вчера цел ден копаа и вадеа ѓубре и шут од куќата, а пред куќата каде што последен пат беше видена исчезнатата Данка по која трага цела Србија, пристигна тешка механизација, која ќе продолжи да работи денес за да се расчисти теренот.
Регион
Нов силен земјотрес ја погоди Грција: се стресе на Крит
Нов земјотрес со јачина од 3,7 степени според Рихтеровата скала ја погоди Грција, соопшти ЕМСЦ.
Земјотресот е регистриран на Крит, на 62 километра од Ираклион, на длабочина од 16 километри.
Земјотресот е регистриран во 12.37 часот по локално време.
Засега нема информации за повредени или материјална штета.
Грција утрово ја погоди силен земјотрес со јачина од 5,7 степени според Рихтеровата скала по што следеа афтершокови.