Регион
СИРИЗА: Нереално е да се очекува Грција да го врати целиот долг
Нереално е да се очекува дека Грција целосно ќе ги отплати своите долгови, изјавил главниот портпарол за економија на грчката ултралевичарска партија СИРИЗА, која изминатиот викенд победи на предвремените парламентарни избори во земјата.
„Никој не верува дека грчкиот долг е одржлив“, изјавил за BBC, портпаролот на СИРИЗА Еуклид Цакалос.
„Се уште не сум сретнал економист кој навистина верува дека Грција целосно ќе ги отплати своите долгово. Тоа е невозможно“, рекол Цакалос и додал дека лидерите на Европската унија (ЕУ) би требало да покажат дека се подготвени да соработуваат со СИРИЗА, партијата која остро се противи на натамошната примена на рестриктивните мерки на штедење во Грција.
„Европа ќе постане доста чудна и опасна, со многу силни центрифугални политички сили, доколку покаже дека не е подготвена да разговара со новата влада, избрана на демократски одржаните избори“, истакнал портпаролот на СИРИЗА.
„Тоа ќе биде конечен сигнал дека се работи за Европа која не може да прифати нити демократски, нити општествени промени“, рекол Цакалос, сепак додавајќи дека најголемиот страв и ноќна на партијата е „распад на Еврозоната поради банкротот на Грција“.
„Доколку Грција банкротира и излезе од Еврозоната, тогаш Еврозоната ќе се распадне. Ние од почетокот зборуваме дека Еврозоната е во опасност и дека еврото е во опасност, но не поради СИРИЗА, туку поради политиките за штедење“, предупредил Цакалос.
СИРИЗА сака да покрене нови преговори околу условите под кои Грција од меѓународните кредитори доби заем во износ од 240 милијарди евра, но лидерите на ЕУ предупредуваат дека новата грчка владата ќе мора да ги исполни своите обврски кон кредиторите.
Се очекува пак новиот грчки премиер Алексис Ципрас во вторник да ја претстави новата коалициска влада, во чиј состав влегуваат СИРИЗА и партијата „Независнки Грци“. Новата грчка влада во текот на денот ќе положи и заклетва, со што „шокираната“ Европа ќе добие подобар увид во новата грчката администрација, пренесува AFP.
Аналитичарите ја опишале најавената заедничка влада на левицата и десницата како „неприродна коалиција“ и најверојатно краткотрајна, поради тоа што партијата „Независни Грци“ е доста „непредвидлива“, а и двете партии остро се разликуваат во поглед на имиграциската политика.
Меѓутоа и двете партии се противат на програмите на ЕУ и Меѓународниот монетарен фонд за спасување на Грција, која ги примора Грците на тешки мерки на штедење и ја продлабочи болната шестгодишна рецесија, додава AFP.
Претставниците на Брисел и Берлин порачале дека се подготвени да разговараат со новата влада на чело со Ципрас, притоа инсистирајќи дека Атина ќе мора да ги почитува договорите кои ги постигна со меѓународните кредитори.
Ципрас како премиер за прв пат ќе се состане со останатите европски лидери на самитот на 12-ти февруари, на кој една од темите секако ќе биде судбината на Грција во Еврозоната и одржливоста на нејзиниот јавен долг./крај/мф/бс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.