Регион
Словенија: Двајца убиени и двајца тешко ранети во напад во болница
Засега неименуван напаѓач пукал во понеделнкот попладнето од огнено оружје во болница во словенечкиот град Изола врз лекар и двајца полицајци, објавија словенечките медиуми, а во извештаите се наведува дека напаѓачот по инцидентот е убиен од полицијата.
Електронското издание на љубљанскиот дневен весник Delo пренесува дека еден полицаец починал од здобиените повреди, додека лекар и уште еден полицаец се во критична состојба.
Полицајците напаѓачот смртно го застрелале пред болницата кога се обидел да побегне со автомобил, пренесува Delo.
Во тек е истрата, а полицијата засега не објавува други поединости за инцидентот кој се случил по 15 часот во Општата болница во Изола.
Очевидци за локалните медиуми велат дека напаѓачот прво пукал во чекалницата на очното одделение на болницата, а наводно прво бил застрелан лекарот уролог, за кој се наведува дека е мексикански државјанин Луис Ѓилермо Мартинез Бустаманте и бил омилен во заедницата. Тој случајно во тој момент се нашол во близина на напаѓачот, кој според сведоци претходно се распрашувал за него.
Во чекалницата настанала паника, а напаѓачот се обидел да побегне, но од погорните катови се симнал полицаец кој ги слушнал истрелите, а во болницата бил по друга службена работа. Напаѓачот полицаецот прво го застрелал во грбот, а потоа кога овој се обидел да се одбрани со службеното оружје, повторно пукал во него. Полицаецот подоцна им подлегнал на повредите.
Напаѓачот потоа мирно излегол од болницата и се упатил кон својот автомобил. Од возилото повторно започнал да пука и притоа ранил еден полицаец, но бил убиен кога другите полицајци испукале неколку куршуми во автомобилот.
Според неофицијални информации, напаѓачот е 70-годишен маж од близина на Копер. Наводно од претходно им бил познат на полицајците поради грабеж на тамошната филијала на Пошта на Словенија. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.