Регион
Светските медиуми за изборите во БиХ: Националистите во водство
По парламентарните избори во Босна и Херцеговина (БиХ), одржани во недела, светските медиуми пренесуваат дека националистите се во водство во оваа поделена и сиромашна европска земја.
Изборите беа одбележани со потешкотии во избрниот процес и етнички тензии, пишува BBC и додава дека тензиите меѓу Бошњаците, Србите и Хрватите остануваат на високо ниво, пренесува порталот Klix.ba
Некои делови од земјата бараат независност од Сараево, главниот град на една најсиромашните земји во Европа, се наведува во извештајот на BBC, додека останатите медиуми во Велика Британија потсетуваат и на февруарските протести кои се одржаа поради големото незадоволство од состојбата во државата.
„Во оваа земја ништо не функционира“, изјавила Босанката Мирсада Грго за AFP, додавајќи дека ова било последната шанса за будење на народот.
Лидерите на трите етнички групи не успеаја да се договорат околу клучните прашања, важни за напредокот на земјата и нејзиното членство во Европската унија (ЕУ), а таквото однесување на политичарите предизвика голем застој на просперитетот на земјата.
Расположението во државата е генерално лошо, а изборите најверојатно нема да донесат ништо ново, пишува Deutsche Welle.
Voice of America пишува дека врз основа на првичните резултати од пребројувањето на гласовите, националистите се во водство, а конечниот резултат најверојатно ќе донесе „шарен“ состав на државниот парламент, што ќе го успори и процесот на формирање на владата.
Партијата за демократска акција (СДА) е најголем добитник, додека Социјалдеморкатската партија на БиХ (СДП БиХ) е најголем губитник на парламентарните избори, меѓу оние партии кои се претежно се потпираат на бошњачкото избирачко тело, наведува Hina.
Истовремено, додава хрватската агенција, врз основа на првичните резултати објавени во партиските штабови, најголемите хрватски и српски партии го поделиле влијанието меѓу хрватските и српските гласачи.
Според прелиминарните податоци на Централната изборна комисија, најголем број гласови за бошњачкиот член на Претседателството на БиХ добил кандидатот на СДА, Бакир Изетбеговиќ, додека хрватски член на Претседателството ќе биде кандидатот на ХДЗ од БиХ, Драган Човиќ.
За тоа кој ќе биде српски член на Претседателството се уште нема дефинитивни резултати, иако и од двата спротивставени табори, Сојузот на независните социјалдемократи (СНСД) и опозицискиот Сојуз за промени, тврдат дека нивните кандидати (Жељка Цвијановиќ, односно Младен Иваниќ), се во водство.
Претседателот на Централната изборна комисија (ЦИК) на БиХ, Степан Микиќ навел дека во трката за српски член на Претседателството на БиХ, по пребројани 52 проценти од избирачките места, кандидатот на СНСД Цвијановиќ освоила 154.656 гласови, а нејзиниот соперник Иваниќ освоил 153.445 гласови.
„Секако дека на крајот може да дојдеме и до поинакви бројки“, изјави Микиќ во неделата на полноќ.
Лидерот на СНСД, Милорад Додик изјави дека во бројката гласови за Претседателството на БиХ имало податоци кои не биле идентични со состојбата на теренот, но дека и натаму Цвијановиќ води со илјада гласови предност во однос на противкандидатот од Сојузот за промена.
Неизвесна е и трката за претседател на Република Српска, па Додик, кој е кандидат на СНСД за нов мандат, порачал дека конечните резулатите ќе бидат прогласени од ЦИК, наведувајќи дека по пребројувањето на повеќе од 600 илјади гласови, тој има предност во однос на противкандидатот Огњен Тадиќ за околу 12 илјади гласови.
„Остана да се пребројат уште малку гласови, но мислам дека оваа разлика не може да биде достигната со оглед на состојбата со останатиот број на гласови, така што што се однесува до функцијата претседател, ние сме уверени дека го добивме овој мандат“, рече Додик.
Во трката за бошњачкиот член на Претседателството на БиХ, по пребројани 76,52 проценти од избирачките места, Изетбеговиќ освоил 194.455 гласови, следен од Фахрудин Радончиќ со 156.469 гласови.
Кога станува збор за хрватскиот член на Претседателството на БиХ, по пребројани 76,52 отсто од избирачките места, Човиќ освоил 88.994 гласови, а по него следи Мартин Рагуж со 67.948 гласови.
Според податоците на ЦИК, на изборите во БиХ гласале 54,14 отсто од граѓаните. Во Федерацијата гласале 52,73 проценти, а во Република Српска 56,94 отсто. Споредено со изборите во 2010 година, излезноста оваа година е помала во проценти, но номинална поголема, бидејќи на изборите биле регистрирани повеќе гласачи, во однос на оние од 2010 година./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.