Регион
Турција ќе им дозволи на германските пратеници да ја посетат воената база
Турција ја известила владата на Германија дека на групата германски пратеници на почетокот од октомври им е дозволено да ја посетат воздухопловната воена база Инџирлик во јужниот дел од земјата, објави во петокот турскиот министер за надворешни работи Мевлут Чавушоглу на заедничката прес-конференцијата со генералниот секретар на НАТО, Јенс Столтенберг во Анкара.
Турција им ги забрани на германските пратеници посетите на воената база Инџирлик, во кои се сместени и германски војници како дел од меѓународната коалиција предводена од САД против Исламската држава, како одговор за резолуцијата што тие ја изгласаа во Буденстагот со којашто масакрот над Ерменците од 1915 година во Османлиското царство го прогласија геноцид.
Анкара притоа изрази желба германските пратеници пред посетата на Инџирлик да се дистанцираат од резолуцијата.
Германскиот министер за надворешни работи Франк-Валтер Штајнамер во Берлин изјави дека одлуката на Анкара од петокот претставува „политички сигнал“ дека Турција е подготвена да го продолжи дијалогот со Германија по периодот на заострените односи. Додаде дека Турција е важен партнер на Германија и на ЕУ во справувањето со бегалската криза, и дека има централна улога во решавањето на неколку кризи на Блискиот исток.
Генералниот секретар на НАТО на заедничката средба со новинарите со шефот на турската дипломатија го пофали јакнењето на напорите на Турција во борбата против Исламската држава во Сирија и ја опиша како „силна и уважувана“ членка на Алијансата.
Турција пред две седмици покрена голема копнена операција во северна Сирија за од своите граници ги протера џихадистите и да ги спречи милициите на сириските Курди да ја заземат таат територија од која е потисната Исламската држава./крај/мф/сн
Извор: Reuters
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Додик повторно во Русија: Имаме притисок, но остануваме посветени на добрите односи со Москва
Лидерот на босанските Срби, Милорад Додик, повторно отпатува во Русија за да ја изрази својата желба за зајакнување на односите со режимот на Владимир Путин, а денеска на средбата со шефот на рускиот Совет за безбедност, Николај Патрушев, тоа го потврди. Додик отпатува за Санкт Петербург, каде ќе учествува на меѓународниот безбедносен форум организиран од руските власти, а таму го однесе и министерот за безбедност на БиХ, Ненад Нешиќ, со чија партија е во коалиција на државно ниво.
Како што објави јавниот сервис на Република Српска (РТРС), Додик веднаш се сретнал со Патрушев, кој се смета дека е еден од најблиските соработници на Путин. Двајцата разговараа за соработката меѓу РС и Русија, а Патрушев особено ги пофали добрите лични односи меѓу Додик и Путин.
„Вашите одлични лични односи со претседателот на Русија, Владимир Путин, водат до одлични односи меѓу РС и Руската Федерација“, рече Патрушев на средбата, додавајќи дека е свесен дека РС е под голем притисок поради тоа.
Додик одговори дека нема да го поколебаат притисоците.
„Ние сме под голем притисок, но остануваме посветени на добрите односи со Русија“, рече Додик.
Актуелниот претседател на РС, кој е под санкции на САД и Велика Британија, отпатува во Русија во време кога Босна и Херцеговина се соочува со сериозна политичка криза. Министерот за надворешни работи на БиХ, Елмедин Конаковиќ, во понеделникот предупреди дека односите во владејачката коалиција се „најлоши досега“.
Кризата беше предизвикана од барањето на Додик за укинување на техничките измени на изборниот закон, кои беа наметнати во март од високиот претставник за БиХ Кристијан Шмит, како и противењето на најавеното усвојување на резолуцијата во Обединетите нации со која би се прогласил 11 јули како ден за сеќавање на жртвите од геноцидот во Сребреница.
Поради оваа причина, Додик ги актуелизираше своите закани за независност на РС, и тоа го стори во пресрет на неговото заминување во Русија.
„Не можеме да живееме со оние кои работат против нас. Време е секој да тргне по својот пат“, изјави вчера Додик.
Регион
(Видео) Во Хрватска падна снег
На подрачјето на Горски Котар во Хрватска синоќа падна снег, а на места имаше и вистинска снежна покривка.
Снег ја зафати и горанската делница на автопатот А6 Риека – Загреб, но работниците на зимската служба минаа низ снегот и до утрово нема ограничувања во сообраќајот, јавува Н1.
Регион
Вучиќ во ОН: Курти денес не е во Њујорк оти води тајна кампања во Северна Македонија
За време на седницата на Советот за безбедност на Обединетите нации посветена на шестмесечниот извештај на генералниот секретар на ОН Антонио Гутереш за работата на УНМИК, српскиот претседател Александар Вучиќ го обвини лидерот на движењето Самоопределување, Аљбин Курти за мешање во внатрешните работи на Македонија.
Вучиќ истакна дека Курти не бил присутен на седницата во Њујорк бидејќи бил зафатен со водењето на изборната кампања на неговата партија во соседна држава.
Вучиќ изрази изненаденост од тоа што, според него, најпопуларен политичар во Македонија е претседателот на Србија, иако нема кампања во таа земја.
Тој посочи дека како претседател на Србија се извинува за постапките на, како што го нарече, српскиот граѓанин Аљбин Курти и истакна дека мешањето во внатрешните работи на Северна Македонија не е политика на Србија, туку постапка на неодговорен граѓанин.