Регион
Турската полиција со солзавец ја растури Поворката на гордоста, приведени германски пратеници
Турската полиција приведе 19 лица, меѓу кои двајца германски пратеници, и употреби солзавец во центарот на Истанбул во неделата за да ги растера неколкуте десетици активисти кои се обидоа да ја одбележат годинешната седмица на Поворката на гордоста, откако властите претходно ја забранија од безбедносни причини по заканите на екстремните десничарски и националистички движења.
Организаторите ја откажаа годинешната Парада на гордоста, којашто од 2003 година се одржува без инциденти во мирна атмосфера и со околу 100.000 учесници е најголемата таква манифестација во муслиманскиот свет, откако властите не го одобрија нејзиното одржување и испратија силни специјални полициски единици во близина на централниот истанбулски плоштад Таксим.
Меѓу оние кои беа накусо приведени во неделата е и пратеничката од германскиот Бундестаг Тери Рејнтке и пратеникот Волкер Бек, активистички ветеран за правата на хомосексуалците. Покрај нив, приведени се уште двајца германски државјани.
Властите на Истанбул минатата седмица соопштија дека поворката е забранета поради загриженоста за јавниот ред и за безбедноста. Безбедносните услови во мегалополисот и она веќе се заострени по низата бомбашки напади последните месеци за коишто одговорноста ја преземаа џихадистичката Исламска држава и курдските герилци.
Екстремните десни групи, како Големата унија (BBP) и Здружението на младите муслимани од Анадолија, исто така, изминатите денови упатуваа закани за учесниците на годинешната парада која требаше да се одржи во рамките на манифестацијата Недела на гордоста од 20-ти до 26-ти јуни со главната поворка на главната истанбулска авенија Истикал, во близина на историскиот централен плоштад Таксим.
Иако хомосексуалноста не е злосторство во Турција, за разлика од многу други муслимански земји, активистите велат дека хомофобијата е широко распространета. Според нив, претседателот Реџеп Тајип Ердоган и неговата исламско-конзервативна Партија на правото и правдата (АКР) покажува малку интерес за заштита и јакнење на првата на малцинствата, хомосексуалците и жените и не толерираат поинакво мислење./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.