Регион
Во Грција 10.000 луѓе излегоа на улиците на годишнината од полициското убиство на тинејџер
Околу десет илјади луѓе излегоа во саботата во поворки во повеќе грчки градови, како Атина, Солун и Патрас, на протести со кои се одбележува сеќавањето на 15-годишниот Алексис Григоропулос, кој во декември 2008 година беше застрелан од полицаец.
Според тамошните медиуми, во Атина четири илјади демонстранти се движеле во поворка којашто била будно следена од полициски сили. Оваа манифестација во грчката престолнина минала мирно.
Меѓутоа, во Солун, каде што во одбележувањето на трагедијата учествувале повеќе од шест илјади луѓе, дошло до помали кошкања со полицијата којашто употребила солзавец. За време на инцидентите биле оштетени излози на продавници и камерите за надзор на банки. Полицијата соопшти дека уапсила неколкумина припадници на анархистички движења. Судири со полицијата имало и во пристанишниот град Патрас, третиот по големина град во Грција.
Истовремено учесниците на манифестациите изразиле солидарност и со затворениот анархист Никос Романос кој во знак на протест повеќе од месец штрајкува со глад. Овој 21-годишен анархист беше осуден на 15 години и 11 месеци затвор, за двоен вооружен грабеж на банки и земање заложници во 2013 година. За време на притворот, тој успешно го положи државниот испит, што му овозможува да се запише на атинскиот универзитет, но не може да се образува.
Романос побара да му биде дадено „отсуство за учење’, меѓутоа министерството за правда на Грција смета дека тоа е невозможно. Младиот човек се прогласи себеси за „политички затвореник“ и „анархистички борец против власта“. Лекарите сметаат дека неговото здравје е сериозно загрозено. Левичарските и анархистичките организации го осудуваат одбивањето на власите да му обезбедат на Романос „гарантираното во уставот право на образование“, и бараат тој да биде ослободен од затвор за да може да студира. Властите стравуваат дека евентуалната негова смрт, анархистичките радикали ќе го направат свој херој и може да испровоцираат нов бран немири и масовни судири со полицијата во грчките гадови.
Грчкиот премиер Антонис Самарас се согласи во понеделник, 8-ми декември, да се сретне со семејството на Романос. Досега властите на младиот анархист му предложија да студира вонредно, без напуштање на затворот, но тој го одби предлогот.
Медиумите истакнуваат дека Романос бил другар со Алексис Григоропулос и бил со него кога тој беше убиен од полициски истрел.
Убиството во декември на петнаесетгодишниот Григоропулос предизвика дотогаш невидени судири меѓу грчката младина и полицијата, големи уништувања и подметнувања пожари во кои изгореа стотици продавници, банки, бензински пумпи и возила, кои траеја повеќе од три седмици. Стопанската комора на Атина соопшти дека тогаш само во главниот град биле уништени 565 дуќани, а штетите беа проценети на 200 милиони евра.
Судењето на двајцата полицајци обвинети за убиството на тинејџерот траеше повеќе од година. Балистичките тестови покажаа дека куршумот директно го погодил в срце Григоропулос со рикошет, но според сведоци, 38-годишниот полицаец пукал во насока на група тинејџери кои блокирале патролен полициски автомобил. Судот утврди дека полицаецот е виновен за убиство со умисла и во октомври 2010 година го осуди на доживотен затвор. Вториот полицаец беше осуден за соучесништво во злосторство, и доби 10 години затвор.
По оваа трагедија секој 6-ти декември приврзаниците на левичарските организации и анархистички движења одржуваат демонстрации во знак на сеќавање на убиеното момче, повикувајќи на „отпор кон властите и солидарност со политичките затвореници“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.