Регион
Во Грција уапсени четворица за подготовка атентати во Белгија
Грчката полиција уапсила по налог на Европол четворица Мароканци, вклучително и наводниот лидер на исламистичка група од Белгија коишто се подготвувале за извршување терористички напади, пишуваат во саботата атинските медиуми.
Според сознанијата на грчките медиуми од извори блиски на истрагата, во моментот се врши идентификација на уапсените кои се осомничени за учество во подготвување на џихадистички напади во Белгија. На истата тема, во саботата навечер се одржува и итен состанок на министерството за јавен ред и заштита на граѓаните, пишува интернет изданието на весникот Прото тема. Други поединости не се соопштени.
Во четвртокот белгиската полиција спроведе голема антитерористичка операција во градот Вервиерс, во текот на која беа уапсени 15 лица осомничени за подготовка терористички напади низ Белгија, двајца беа убиени а еден ранет. Во становите на осомничените биле откриени големи количества автоматски пушки, рачни фрлачи, муниција и експлозиви, како и полициски униформи. Според соопштението на белгискиот државен обвинител операцијата била спроведена против лица кои се вратиле од боиштето од Сирија, и постојат информации дека планирале „големи напади“, во прв ред на полициски станици. Нивото на безбедност во цела Белгија е подигнато на највисоко ниво, а во готовност се ставени и специјалните сили на белгиската армија.
Според грчкиот весник Етнос, еден ден по антитерористичката операција во Вервиерс, Белгија во петокот преку разузнавањето и CIA ги известила Грција и Турција дека во двете земји има џихадисти кои се вклучени во подготовката на терористички напади на нејзина територија. Белгиските власти, имено, утврдиле дека еден од исламистите уапсени во операцијата во четвртокот добивал телефонски повици од Грција.
Не е исклучено дека меѓу уапсените во Грција е и водачот на групата исламисти, 27-годишниот Абделхамид Абауд, кој според сознанијата на белгиските медиуми, телефонски контактирал од Грција со еден од уапсените во белгиски Лиеж./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Силно невреме со поплави во Грција, Волос без струја
Силно невреме ја зафати Грција, поточно Лариса, каде обилните дождови доведоа до излевање на канализацијата, која ги поплави улиците, а во Волос е забележан и прекин на струја.
Врз основа на податоците од метеоролошката станица на Националната опсерваторија во Атина, измерени се просечни 100 милиметри дожд или максимални 312 милиметри на час, поради што полицијата мораше да го прекине сообраќајот бидејќи улиците беа поплавени.
Во градот Волос во текот на ноќта имало проблеми со струјата, но како што пренесуваат грчките медиуми, се е брзо ставено под контрола.
Министерот за цивилна заштита и климатска криза Василис Кикилијас од вчера е во Тесалија за внимателно да го следи развојот на невремето.
– Имаше оправдана загриженост на граѓаните овде во Тесалија бидејќи сеќавањата за катастрофата се свежи, затоа бевме сите овде, координирани и организирани. Драго ми е затоа што досега овој напор се исплатеше. Само со заедничка и координирана работа можеме да добиеме многу добри резултати – најави тој.
Силен дожд и невреме го зафати јужниот дел на Пелион, а како што јавуваат медиумите паднал и град. Овој регион во септември минатата година беше соочен со разорни поплави.
Ненадејна промена на времето се случи и на големите височини во централна и северна Грција, каде падна снег.
„Снежно невреме е забележано во ски-центарот на Василица“, се наведува.
Во меѓувреме, населението е најмногу загрижено за земјиштето околу езерото Карла на границата на Магнезија и Лариса, кои беа поплавени во септември минатата година. Полињата, па дури и воените инсталации во Стефановики се под тони вода.
Регион
Сообраќајка на бугарски автобус во Турција, повредени 11 лица
Единаесет лица се повредени кога автобус со бугарски регистарски таблици што сообраќал од Истанбул за Бугарија се превртел во областа Киркларели во Турција, јави агенција та Анадолија.
Сообраќајната несреќа се случила на 50 километри од бугарската граница. Автобусот е на компанијата „Метро туризам“.
На местото на несреќата се упатени екипи на полиција и медицински лица.
Повредените, вклучувајќи го и возачот на автобусот, се хоспитализирани во околните болници.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.