Регион
Во центарот на Атина избувнаа судири, анархистите го запалија грчкото знаме
Околу 18.000 луѓе, според процените на полицијата, учествувале во четвртокот во грчката престолнина Атина во традиционалната поворка кон амбасадата на САД, одбележувајќи ја годишнината од студентскиот бунт против воената хунта од 1973 година крваво задушена една година пред падот на хунтата поддржувана од американската Централна разузнавачка агенција (CIA), а вечерта во близина на Политехничкиот атински универзитет избувнаа безредија кога анархистите го запалија грчкото знаме, а државниот обвинител ѝ одобри на полицијата да влезе во кампусот, кој инаку ужива автономија, пренесуваат медиумите.
Слична протесна поворка во четвртокот вечерта се одржува и во Солун
Безредијата започнаа откако илјадници демонстранти по повод 43-годишнината од бунтот на студентите на Политехничкиот универзитет, тргнаа кон амбасадата на САД. Во оваа поворка учествувале околу 700 анархисти, коишто од американската амбасада се упатиле кон квартот Егзархија, каде се наоѓа универзитетот.
Анархистите заземале еден од објектите на универзитетот, а на улиците почнале да ги фрлаат столчињата, маси, и од мебелот да подигнуваат барикади, палејќи ги пластичните контејнери за отпад, фрлајќи камења и молотови коктели врз полицајците, пренесуваат медиумите.
„Младите луѓе го сквернавеа грчкото знаме, пишувајќи на него пароли, го искинаа, газеа и на крајот го запалија знамето. Портпаролот на обвинителот, Илиас Загореос ѝ даде дозвола на полицијата да влезе во универзитетот, бидејќи таму се наоѓаат извршителите на кривичното дело“, пишува интернет изданието на весникот Proto Thema.
Универзитетите во Грција уживаат широка автономија и право на азил, влезот на полицијата на нивните територии е забранет, што често го користат анархистите и други нарушители, криејќи се во кампусите.
Медиумите објавија дека во дворот на универзитетот избувнал голем пожар,нона пожарникарите не им било овозможено да го изгасат.
Портпаролот на опозициската партија Неа Димократиа, Јоргос Кумуцакос, во врска со сквернавењето на националното знаме побара од владата да го воспостави редот. „Подлеците го запалија грчкото знаме. Никаков забранет влезво просториите каде што се наоѓаат оние коишто го осквернавија симболот на целиот народ. Владата мора конечно да воспостави ред“, рекол.
Пред овој инцидент, во судири со полицијата влегле две групи анархисти од по 80 до 100 луѓе, проценуваат медиумите.
Собирот кој започна претпладнето во Атина се одвиваше ден по заминувањето на американскиот претседател Барак Обама, кој во вторникот и во средата во грчката престолнина се заземаше за демократија и на Грција ѝ упати поддршка за економските напори, на големо задоволство на левичарската влада на премиерот Алексис Ципрас.
Во четвртокот на повеќето транспаренти можеа да се прочитаат пораки против фашизмот, империјализмот, НАТО и војните коишто ги водат САД надвор од своите граници. Четириесет лица беа уапсени поради сослушување пред одржувањето на собирот, дознава AFP од полициски извори.
Силите за спроведување на редот со камионети го блокираа приодот кон плоштадот Синтагма, кој изминатите години често се претвораше во бојно поле.
Полицијата во средата ноќта во Атина брзо растера околу 2.500 демонстранти активисти на левицата и анархисти кои се противеа на доаѓањето на американскиот претседател Барак Обама. Специјалните сили со големи количества солзавец сакаа да ја спречат поворката да се пробие во центарот на градот кој беше блокиран од полицијата поради престојот на Обама.
Поворката по диктатурата на ткн „црни полковници“, од периодот 1967 до 1974 година се организира секоја година и во неа понекогаш учествуваат и повеќе десетици илјади луѓе, а со неа се осудува поддршката на САД на државниот удар од 1967 година.
Во текот на претпоследната посета на американски претседател на Атина, во1999 година, Бил Клинтон се извини поради мешањето коешто до децении го поттикнува антиамериканското расположение во Грција.
На 17-ти ноември 1973 година воената хунта испрати тенкови на Политехничкиот универзитет во Атина кој беше заземен од студентите и граѓани, протестирајќи против диктатурата. Најмалку 24 луѓе загинале, а повеќе десетици биле ранети./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Завршено вештачењето на мобилниот телефон на мајката на Данка, биле бришени пораки и повици, објавија српските медиуми
Мобилниот телефон на мајката на Данка Илиќ бил испратен на вештачење по исчезнувањето на девојчето. Неофицијалните податоци говорат дека мајката избришала многу пораки и повици ден пред и на денот на исчезнувањето на Данка, објави српски „Блиц“.
Според неофицијални сознанија од истрагата, вештачењето на мобилниот телефон на Ивана Илиќ покажало дека се избришани многу пораки и податоци за повици, пишува српски „Информер“.
„На ден пред исчезнувањето и на денот на исчезнувањето на Данка Илиќ многу пораки и повици се избришани од телефонот. Ова го утврдиле инспекторите за високотехнолошки криминал. Пораките и повиците може да се избришат од телефонот, но да останат во базата на податоци“, рекол изворот.
Како што се дознава, пред исчезнувањето на Данка Илиќ мајката трипати го фотографирала детето од разни агли.
Да потсетиме, мајката на Данка Илиќ, Ивана, денеска повторно е во полициската станица во Бор, каде што е на распит за околностите на својата исчезната ќерка. Таткото помина на полиграфското тестирање.
Регион
„Клучот е кај родителите, тие мора да одговорат на едно прашање“, вели поранешен шеф на белградската полиција за случајот со исчезнувањето на Данка
Родителите се тие што имаат многу да објаснат. Прво, зошто чекаа да го пријават исчезнувањето? Колку што знам, чекаа два часа. Познато е дека кога ќе исчезне дете, веднаш се пријавува за да се реагира бргу, изјави Марко Ницовиќ, поранешен началник на белградската полиција, за „Телеграф.рс“.
Според Ницовиќ, полицијата оди во добра насока бидејќи ја проверува секоја педа од земјата, но се надеваат и дека темелно се проверуваат граничните премини бидејќи не ја исклучуваат можноста за киднапирање.
„Би можело да биде сè, не е исклучена никаква можност. Ако мајката рече дека го оставила девојчето на минута, го поставуваме прашањето каде би можело да оди двегодишното дете? Колку далеку, без мајка му да го најде? Второ, зошто чекаа два часа? Има простор и за киднапирање, а знаеме дека границата е блиску, но и за многу повеќе. Отворени се многу прашања и останува да се почека истражните органи да си ја завршат работата“, вели Ницовиќ за српски „Телеграф“.
Да потсетиме, потрагата по двегодишната Данка Илиќ влезе во четвртиот ден. Во потрагата од утрово се вклучени уште 18 пожарникари и кучето Зиги.
Багери вчера цел ден копаа и вадеа ѓубре и шут од куќата, а пред куќата каде што последен пат беше видена исчезнатата Данка по која трага цела Србија, пристигна тешка механизација, која ќе продолжи да работи денес за да се расчисти теренот.
Регион
Нов силен земјотрес ја погоди Грција: се стресе на Крит
Нов земјотрес со јачина од 3,7 степени според Рихтеровата скала ја погоди Грција, соопшти ЕМСЦ.
Земјотресот е регистриран на Крит, на 62 километра од Ираклион, на длабочина од 16 километри.
Земјотресот е регистриран во 12.37 часот по локално време.
Засега нема информации за повредени или материјална штета.
Грција утрово ја погоди силен земјотрес со јачина од 5,7 степени според Рихтеровата скала по што следеа афтершокови.