Регион
Во Турција деактивирана автомобил бомба со 150 кгр експлозив
Турските пиротехничари деактивирале експлозивна направа пронајдена изминатата ноќ во возило во близина на владин објект во град во курдскиот југоисток на Турција, пренесуваат во петок медиумите повикувајќи се на полициски извори.
Возилото со 150 килограми експлозив е пронајдено во градот Гани во делот од покраината Дијарбекир, населена со мнозинско курдско население. Полицијата во рамките на истрагата ги проучува снимките од безбедносните камери поставени во областа околу владиниот објект.
Свеченост по повод Ден на сеќавање на мачениците и за 101-годишнината од битката кај Чанаккале, требаше да се одржи во петок во државните институции, потсетува агенцијата Anadolu.
Курдските екстремисти во четвртокот ја преземаа одговорноста за самоубиствениот напад од неделата во турската престолнина Анкара во кој загинаа 35 луѓе и двајца атентатори. Притоа групата Јастреби на слободата на Курдистан (ТАК) најави нови напади врз владини цели и безбедносните сили на Турција, откако ја презема одговорноста и за нападот од февруари, исто така, во Анкара кога беа убиени 29 лица.
Поради таквите закани, Германија ги затвори од четвртокот своите дипломатски мисии и образовни институции во Турција.
Американската амбасада во Анкара издаде соопштение за своите државјани да ги имаат предвид мерките за претпазливост, наведувајќи дека овој викенд се одбележува Курдската нова година – Невроз, како и дека на големите настани може да дојде до судири и насилства.
Амбасадата на САД, исто така, потсетува дека цели на терористичките организации во последно време беа железничките и автобуските станици, институциите на турската влада и јавни простори/.крај/мф/сн
Извор: Anadolu
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.
Регион
Се вештачат трагите од предметите пронајдени во автомобилот во кој била убиена малата Данка
Телото на малото девојче Данка Илиќ (2), кое на 26 март годинава беше брутално убиено во Бањско Поле, сè уште не е пронајдено.
Осомничениот Дејан Драгијевиќ (50) во Вишото јавно обвинителство во Заечар ги изнесе деталите за убиството на детето. Сепак, тој не сакаше да открие каде го фрлил телото на Данка.
Срѓан Јанковиќ (50) не сакал да зборува за делото, а вчера побарал да му дозволат адвокат по службена должност. Во притвор е и таткото на Дејан Драгијевиќ, кој исто така се бранеше со молчење на обвинувањата дека му помогнал на синот да се ослободи од телото.
Понатамошни чекори во истрагата за „Телеграф.рс“ најавија од Вишото јавно обвинителство во Заечар.
„Вишото јавно обвинителство во Заечар издаде наредба вештаци да ги прегледаат трагите пронајдени во автомобилот на Јавното претпријатие за комунални дејности ‘Водовод’ од Бор“.
Сослушувањата на сведоците се во тек.
Вчера, во Вишото јавно обвинителство во Заечар дадоа исказ Ивана и Милош Илиќ, родителите на убиената Данка.