Регион
Започна судењето на романскиот премиер Понта
Судењето за корупција против романскиот премиер Виктор Понта започна во понеделникот во Букурешт, но тој не присуствуваше на првото рочиште.
Социјалдемократот Виктор Понта, којшто е првиот романски премиер кому му се суди во текот на траењето на мандатот, тврди дека е невин. Инаку не беше задолжително неговото присуство на сослушувањето пред судот.
„Не бев повикан, но подготвен сум да заминам и да се појавам пред судиите, во надеж дека ќе ме сослушаат и ќе им го објаснам она што му е јасно на студент на втора година по право“, изјави 43-годишниот Понта за новинарите по состанокот на врвот на неговата партија.
Притоа повторно ја исклучи можноста да поднесе оставка и изјави дека за Романија е важно да има стабилност.
На власт од 2012 година, Понта е првиот премиер во историјата на Романија кој ќе треба да се брани од обвинувањата пред судот, додека уште е на функција. Обвинет е за „17 случаи на фалсификување, соучесништво во даночни затајувања и перење пари“, за дела сторени во периодот од 2007 до 2011 година додека бил адвокат.
Романското обвинителство за корупција DNA го сомничи за судир на интереси при именувања министри, кога во три случаи тоа било лице кое му е блиско, на кое исто така ќе му се суди.
Романското обвинителство објави во средината на август дека го запленило станот на Понта, откако било утврдено дека ја оштетил државата за 11,58 евра со учество во даночна евазија. Романскиот премиер, кој ги отфрла ваквите обвиненија, ги обвини обвинителите дека „манипулираат со јавното мнение“ и објавуваат нецелосни информации. Тој е обвинет за фалсификување и учество во даночно затајување и перење пари.
Истрагата се однесува на периодот кога Понта бил адвокат и соработувал со Дан Сова, поранешен министер за сообраќај во неговата влада, кој исто така е под истрага поради корупција.
Обвинителството тврди дека адвокатската канцеларија на Сова му платила на Понта одредена сума за работа којашто не ја извршил, и тоа го искористил за одбивање на даноците, со што ја оштетил државата. Понта, пак, тврди дека платил повеќе данок отколку што наводно ја оштетил државата.
Виктор Понта одби да се повлече од должноста кога започна истрагата, меѓутоа се повлече од челната позиција во владејачката Социјалдемократска партија. Во јуни годинава го преживеа гласањето за доверба./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Додик не го признава геноцидот во Сребреница: „Ќе однесеме цвеќе, ако не навредува никого“
Во четвртокот, лидерот на Србија во Босна и Херцеговина, Милорад Додик, изрази подготвеност да го посети Меморијалниот центар Поточари во Сребреница и да положи цвеќе на заедничкиот споменик подигнат во спомен на масакрот на Бошњаците за време на војната, но тој повторно негираше дека таму имало геноцид.
Во интервју за новинската агенција на Република Српска, претседателот Додик најави дека владата и целото раководство на овој ентитет ќе заседаваат во Сребреница на 2 мај 2024 година, кога ќе се одржи дискусија пред Обединетите нации и се очекува гласање за Резолуција за осуда на геноцидот во тој град во летото 1995 година.
Резолуцијата е поддржана од дваесет земји, меѓу кои САД, Обединетото Кралство и Германија и се очекува нејзино усвојување. Целта е да се интернационализираат страдањата на Бошњаците во Сребреница.
Водечките српски претставници од Белград и Бања Лука, претседателите Александар Вучиќ и Милорад Додик, тврдат дека ова е обид да се префрли вината на српскиот народ.
„Република Српска нема да ја прифати резолуцијата за Сребреница за која ќе се одлучува во Генералното собрание на ОН бидејќи се што е напишано во неа е лага. Босна и Херцеговина не може да живее врз основа на тоа дека едната нација во неа е оквалификувана како геноцидна“, рече Додик.
Сепак, тој изрази подготвеност да им оддаде почит на жртвите од масакрот во Сребреница.
„Ако ни се укаже можност, на 2 мај ќе однесеме венци во Поточари, ако тоа не навреди никого. Не се плашам дека би можел да завршам како Вучиќ, кој дојде да им оддаде почит на жртвите, изрази сочувство, а доби камен во главата и никој не одговараше за тоа“, истакна Додик.
Тој смета дека Резолуцијата за Сребреница сепак нема да го добие потребното мнозинство на седницата на Генералното собрание на ОН.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.