На полноќ во Хрватска започнува предизборната кампања за претседателските избори во земјата, а покрај актуелниот претседател Иво Јосиповиќ, кандидати се и Колинда Грабар-Китаровиќ, Милан Кујунџиќ и Иван Вилибор Синчиќ, соопштила Државната изборна комисија на Хрватска, пренесува Hina.

Кандидатот на хрватската Социјалдемократска партија, актуелниот претседател Јосиповиќ е правник и композитор роден на 28-ми август 1957 година, а според политичките ставови е социјалдемократ кој промовира човекови права, како и еколошки вредности и програми.

Кампањата за новиот мандат Јосиповиќ ја започнува со мотото „Тоа е вистинскиот пат“, со предлози за уставни промени како предуслов за спроведувањето на економските реформи, неопходни за економското опоравување на Хрватска. Според него, до економското опоравување на Хрватска може да се дојде само преку структурни реформи на администрацијата и управата. Тој се залага за децентрализација на земјата а ја промовира и новата енергетска улога и големиот потенцијал на Хрватска.

Неговиот противник во претседателската трка, кандидатката на Хрватската демократска заедница, Колинда Грабар Китаровиќ кампањата ја започнува со мотото „За подобра Хрватска“. Китаровиќ е поранешна министерка за надворшни работи и европски интеграции во периодот од 2005-та до 2008-та година, а од таа година па до 2011-та работеше како хрватски амбасадор во САД, и е првата жена која беше именувана како помошник на генералниот секретар на НАТО за јавна дипломатија.

Грабар Китаровиќ својата изборна програма ја базира врз решавањето на економските проблеми и истакнува дела главната причина за нејзината кандидатура е тешката економска и социјална состојба во земјата.

За разлика од Јосиповиќ, таа смета дека на земјата не и се потребни нови основи, нити пак нов Устав. Доколку таа победи на изборите, Хрватска ќе ја добие првата жена претседател во својата држава.

Милан Кујунџиќ е претседателскиот кандидат на Сојузот на Хрватска, а по професија е доктор. До 1990-та година не бил член на ниедна политичка организација а потоа станал член на Хрватската демократска партија. Две години подоцна тој станува дел од Хрватската демократска заедница, која ја напушта во јуни 2013-та година и неколку месеци подоцна ја основа партијата Хрватска Зора. Неговото мото е „работа, работа и само работа“.

Четвртиот кандидат во претседателската трка, граѓанскиот активист Иван Вилибор Синчиќ на изборите учествува поради тоа што сака да предупреди на проблемот од неможноста за подмирувањето на долговите и враќањето на кредитите во постоечкиот систем.

Кандидатот на здружението „Жив ѕид“ има 25 години, апсолвент по електротехника, а за време на четирите години на активизам и политичка работа бил организатор на многу акции и иницијативи насочени против почитичките елити.

Како што претходно најавија, претседателските кандидати за време на кампањата ќе ја обиколат цела Хрватска за да им ја претстават својата програма на граѓаните и да ги убедат да гласаат за нив и да им го доделат претседателскиот мандат кој трае пет години. Денот за одржувањето на претседателските избори во Хрватска е закажан за 28-ми декември./крај/мф/бс