Напади во Германија: Вчера експлозија во електрана, денес нова саботажа

Еден ден по експлозијата во трафостаницата до термоцентралата на истокот од Германија, саботажа беше извршена и денес во трафостаницата на западот од земјата во близина на Келн. Политичарите веруваат дека станува збор за напад со терористичка позадина.

„Врз основа на досегашните наоди, претпоставуваме дека станува збор за напад зад кој стојат или сторители од странство или од екстремно левичарската сцена“, изјави министерот за внатрешни работи на сојузната покраина Северна Рајна-Вестфалија, Херберт Ројл.

Полицијата претходно потврди дека краткиот спој во трафостаницата во близина на Келн се случил откако непознати лица го предизвикале на високонапонските кабли, поради што неколку блока од термоцентралата Бергхајм се исклучиле.

Како што објави покраинското Министерство за енергетика, прекинот не предизвикал губење на електрична енергија во домаќинствата.

Министерката за енергетика Мона Нојбаур посочи на сличен инцидент што се случи вчера на истокот од земјата кога експлозија уништи цевковод до термоцентрала јужно од Берлин.

Во овој случај, полицијата го смета и за чин „насочен против уставниот поредок на Германија“.

Во Берлин и на западот од Германија, во последните месеци веќе се извршени неколку напади врз инфраструктурата за снабдување со електрична енергија и железничкиот транспорт. Во повеќето случаи, одговорноста ја презеде левичарска екстремистичка мрежа.

Неодамна, Германија беше цел на таканаречената хибридна војна, за која се верува дека стои зад Русија.

Вчера, германската влада ја обвини Русија за најновиот напад од ваков вид, кој се случи на аеродромот во Лајпциг, и нареди нови санкции, вклучително и затворање на рускиот конзулат во Бон.