Сикорски: Путин нема сила да ја нападне Полска

Русија во моментов нема воен капацитет за голем напад врз Полска, но би можела да прибегне кон провокации и хибридни операции, изјави полскиот министер за надворешни работи Радослав Сикорски.

Во интервју за италијанскиот весник „Ил Месадјеро“, тој рече дека Варшава сериозно ги сфаќа предупредувањата за можна руска закана, но дека не очекува директен воен напад врз полска територија.
„Владимир Путин нема средства да нè нападне денес. Најмногу што може да се обиде е некаков вид провокација“, рече Сикорски.

Шефот на полската дипломатија потсети дека прашањето за безбедноста е едно од најважните во односите меѓу Варшава и Москва со векови, наведувајќи дека Полска постојано била изложена на напади од исток низ историјата.

Поради таквото историско искуство, додаде тој, полските власти не потценуваат ниту едно предупредување, но во исто време веруваат дека сега нема причина да се шири паника меѓу населението.

Сикорски, исто така, на почетокот на јули предупреди дека можните провокации би можеле да вклучуваат операции под лажно знаме, употреба на беспилотни летала или обид за префрлање на одговорноста за одредени инциденти на Украина. Потоа тој оцени дека Русија, додека борбите во Украина продолжуваат, не е способна да започне голем напад врз НАТО.

„Мораме да бидеме подготвени и јасно да им кажеме дека знаеме дека подготвуваат нешто опасно. Се надевам дека ваквите јавни предупредувања ќе го одвратат Путин од провокации“, рече полскиот министер.

Полска, како една од клучните членки на НАТО на источното крило на алијансата, во последните години брзо ги зајакнува своите воени капацитети и бара поголемо и потрајно присуство на американските сили на нејзина територија.

Сикорски потврди дека Варшава сè уште верува во американските безбедносни гаранции и бара од Вашингтон да отвори уште една постојана воена база во Полска. На северот од земјата, веќе има американски систем за противракетна одбрана во Реџиков.