Тајланд воведува нови, построги правила за туристите од ЕУ

Тајланд од 15 септември ќе го намали безвизниот престој за патниците од Европската Унија од 60 на 30 дена. Ова ги потврдува претходните најави од популарната туристичка дестинација за промена на правилата за влез во земјата, објавува „Еуроњуз“.

Одлуката, која е најавена од мај, се однесува на туристи од повеќе од 60 земји и територии. Официјалната причина е серија сериозни кривични дела во кои се вклучени странски државјани. Локалните медиуми објавија бројни апсења на странци за трговија со дрога и луѓе и водење нелегални бизниси, како што се хотели и училишта без потребните дозволи.

Причината за построгите правила е зголемувањето на криминалот
Досега, посетителите од повеќе од 90 земји, вклучувајќи 29 членки на Шенген зоната, можеа да останат во Тајланд до 60 дена без виза. За две недели, тој период ќе биде намален на 30 дена за повеќе од 60 земји на листата, вклучувајќи ги и земјите од ЕУ. Конзуларното одделение на Министерството за надворешни работи на Тајланд сè уште не донело одлука за статусот на патниците од преостанатите дваесетина земји. Од друга страна, безвизниот престој за граѓаните на Перу, Бразил и Јужна Кореја се продолжува од сегашните 60 на 90 дена.

Патниците на кои им се потребни повеќе од 30 дена сè уште имаат неколку опции. Посетителите кои влегуваат без виза ќе можат да побараат продолжување на престојот еднаш, а одлуката ќе ја донесе службеник за имиграција. Друга опција е визата „Destination Thailand“ (DTV), која овозможува престој до 180 дена и може да се продолжи за дополнителни 180 дена. Условот за добивање DTV виза е доказ за средства на банкарска сметка од најмалку 500.000 бати, што е околу 13.000 евра. Дигиталните номади кои работат од далечина мора дополнително да обезбедат доказ за вработување надвор од Тајланд.

Овие промени доаѓаат во време кога туризмот на Тајланд, кој сочинува повеќе од 10 проценти од БДП, сè уште се опоравува од последиците од пандемијата. Иако земјата останува една од најпосетуваните на континентот, од почетокот на годината ја посетиле речиси 21 милион странски туристи. Ова е за три проценти помалку отколку во истиот период минатата година, а бројките се сè уште под нивоата пред пандемијата.