Трамп: Биби, ќе останеш сам

Американскиот претседател Доналд Трамп изјави дека го предупредил израелскиот премиер Бенјамин Нетанјаху дека, доколку Израел продолжи со војната против Иран, може да се најде во ситуација каде што „ќе биде сам“ без американска поддршка. Во телефонска изјава за „Аксиос“, Трамп изјави дека Нетанјаху бил предупреден дека продолжувањето на воената ескалација со Иран може да доведе до промена во американскиот пристап и отсуство на поддршка од Вашингтон во случај на нов циклус на конфликт.

„Реков: „Биби, мора да бидеш внимателен или наскоро ќе бидеш сам““, рече Трамп и додаде дека не верува дека Израел ќе ја продолжи војната, пренесува Танјуг.

Тој откри дека неговата администрација во понеделникот наутро добила порака од иранската страна во која се изразува подготвеност да престане со гранатирањето доколку Израел го стори истото.

„Нè повикаа и рекоа дека нема да извршуваат повеќе напади и нè замолија да му кажеме на Израел да не напаѓа повторно“, рече американскиот лидер.

На прашањето дали САД ќе го поддржат Израел доколку Нетанјаху го рестартира конфликтот со Иран, Трамп рече дека не очекува тоа да се случи.
„Не мислам дека тоа ќе се случи. Сè функционира многу добро. Иран го прави она што мора да го направи“, изјави тој за „Скај њуз“.

Тој, исто така, истакна дека има влијание врз израелскиот премиер. „Ако му кажам да направи нешто, тој го прави тоа“, додаде Трамп.

Американскиот претседател рече дека би можел да презентира предлог за договор со Иран во следните неколку дена, велејќи дека преговорите „одат многу добро“. Тој, исто така, процени дека Ормускиот теснец би можел повторно да се отвори за бродови во следните два до три дена. Тој рече дека американската блокада на Ормускиот теснец врши притисок врз Техеран да постигне мировен договор. Трамп тврди дека уште две или три недели бомбардирање на Иран би довело до целосно уништување на земјата, но нагласи дека не сака да бидат убиени многу повеќе луѓе.

„Она што се покажа како многу моќна работа е блокадата. Блокадата се покажа како многу помоќна од бомбардирањето“, рече Трамп.

Ескалацијата меѓу Израел и Иран започна во неделата откако Израел го бомбардираше Бејрут, либанскиот главен град, што предизвика нова рунда меѓусебни напади. Потоа Иран испука неколку ракети кон северен Израел, велејќи дека тоа е одговор на израелските напади во Либан.

Фото: ЕПА