Трамп до Зеленски: Престани да го уништуваш дизелот во Русија, предизвикуваш недостиг

Американскиот претседател Доналд Трамп јавно го повика украинскиот претседател Володимир Зеленски да престане со нападите врз руската нафтена и дизел-инфраструктура, предупредувајќи дека тие, според него, предизвикуваат недостиг на дизел во Русија.

„Претседателот Зеленски мора да направи едно нешто. Мора да престане да го уништува дизелот во Русија. Нека напаѓа цели, но не и дизел, бидејќи тоа предизвикува недостиг на дизел“, рече Трамп.

Украина во изминатиот период изврши серија напади со оружје со долг дострел врз рускиот нафтен и гасен сектор, за кој Киев тврди дека претставува еден од клучните извори за финансирање на руската војна.

Изјавата на Трамп доаѓа во време на нов бран руски и украински напади со беспилотни летала. Според локалните власти, во руски Татарстан загинале две лица, додека украинските власти известија за руски напади со дронови врз пристаништето во Одеса и пожар во близина на граничниот премин со Полска.

Русија во последните недели ја засили воздушната кампања врз Украина, користејќи балистички ракети и беспилотни летала. Москва повторно ја напаѓа и украинската електроенергетска мрежа, а украинските власти предупредуваат дека целта е дополнително да се изврши притисок врз цивилното население пред зимата.

Украина денеска соопшти дека погодила голема рафинерија за нафта во Славјанск, Кубан, во рускиот регион Краснодар. Украинската воена разузнавачка служба тврди дека беспилотни летала погодиле постројки за преработка на нафта и резервоари, по што избувнал голем пожар.

Властите во Краснодарскиот регион соопштија дека во напад врз објект во Славјанск, Кубан, биле повредени три лица и бил оштетен нафтовод. Тие не ги потврдија директно украинските тврдења дека целта била рафинеријата.

Руското Министерство за одбрана соопшти дека во текот на ноќта биле соборени 389 украински беспилотни летала.