Трамп му пиша на Зеленски: САД се восхитуваат на вашиот отпорен дух

Украинскиот претседател Володимир Зеленски ја сподели пораката што му ја испрати американскиот претседател Доналд Трамп по повод Денот на независноста на Украина.

Зеленски објави на социјалната мрежа X дека добил „топла и охрабрувачка“ честитка од Трамп по повод 35-годишнината од враќањето на украинската независност.

„Почитуван господине претседателе, во име на американскиот народ, ви честитам вам и на народот на Украина за Денот на независноста. 24 август е ден за прославување на нашето трајно пријателство, изградено врз темелите на 35 години дипломатски односи, врска која само се зацврсти откако Украина ја стекна својата независност.

Благодарение на храбрите и талентирани луѓе, изградивте одлична земја. Додека го одбележувате овој значаен настан, знајте дека Соединетите Држави се восхитуваат на вашиот отпорен дух, ги почитуваат вашите жртви и остануваат уверени во вашата иднина како суверена и просперитетна нација.

Да го искористиме овој момент за да го завршиме конфликтот и да изградиме траен мир што ќе го отклучи огромниот потенцијал на Украина за идните генерации. Со почит, Доналд Џ. Трамп.“

Зеленски му се заблагодари на Трамп за неговата порака, но во исто време го потсети на потребата на Украина од ракети пресретнувачи „Патриот“ за системи за воздушна одбрана.

„Овие зборови, исто како звукот од лансирањето на ракетата „Патриот ПАК-3“, го креваат нашиот морал и ни даваат надеж дека животите можат да бидат заштитени од бруталните руски напади и дека може да се постигне достоинствен мир. Ви благодарам, претседателе Трамп, и на сите Американци за вашата поддршка и честитки“, нагласи Зеленски.

фото/Depositphotos