Туск: Би било идиотски да се попречува патот на Украина кон ЕУ или воената помош поради билатерални спорови

Полскиот премиер Доналд Туск категорично ја отфрли идејата дека, поради билатерални спорови, Полска треба да го попречи патот на Украина кон Европската Унија (ЕУ), или дека Унијата дури треба да ѝ одбие воена помош додека е во војна со Русија, а подоцна и пари за реконструкција.

Тој го нарече тоа барање на полските опозициски националисти „идиотски“.

„Тоа е убиствена политика, тоа се идиотски зборови“, одговори Туск на прес-конференција во Париз во врска со барањето на опозициската партија „Право и Правда“ Полска да мора да ја принуди ЕУ да престане да го финансира вооружувањето на Украина и нејзината реконструкција и да стави вето на отворањето на кластерот.

Пшемислав Чарнек, кој се смета за кандидат за премиер од редовите на сегашната опозиција, ги презентираше овие барања и нагласи дека помошта за Украина може да се обнови само кога официјален Киев „ќе се врати на човечките вредности“.

Во неделата, пратениците на „Право и Правда“ подготвија предлог за резолуција на Сејмот (полскиот парламент) за вето на отворањето на кластерот, сè додека Киев не престане да ја величи Украинската бунтовничка армија (УПА) и националистите кои соработуваа со нацистите и убија, според полските проценки, околу 100.000 полски цивили во селата во западна Украина во етничкото чистење во Волинија и Галиција од 1943 до 1945 година.

„Прашувам, дали Украина навистина сака да се приклучи на ЕУ? Бидејќи ако сака, прво мора да ја реформира државата, да се бори против корупцијата и да престане да ги величи соработниците со нацистите. Нема величење на нацистите во Европа, ниту во ЕУ, ниту во Германија, ниту фашистите во Италија. Ако го сторат тоа во Украина, прво мора да размислат дали навистина сакаат да се приклучат на Европа“, се придружи на барањето на Чарнек во интервју за телевизијата Полсат.

Туск, по повод продолжувањето на растечките тензии од страна на опозицијата и шефот на државата, денес изјави дека тие се натпреваруваат да бидат повеќе против Украинците.

„Можам само да апелирам до сите политичари во Полска, без исклучок бидејќи политичарите најчесто го шират овој агресивен наратив, да престанат да зборуваат такви глупости. Во интерес на безбедноста на Полска е ефикасно да ја одбрани Украина од Русија. Точка. Крај“, рече полскиот премиер.

Туск, исто така, ја критикуваше опозицијата за правење скандал од фактот што Полска, на барање на своите сојузници, испрати неколку ракети за противракетниот систем „Патриот“ во Украина, додека конзервативните националисти често и жестоко ја критикуваа Германија за тоа што не ја снабдува Украина со овие ракети.

„Видовте каква сосема непотребна бура предизвика нашата одлука да испратиме пет ракети, според договорот со НАТО и Американците“, рече Туск.

Самата Полска, според Туск, во моментов не планира голема воена помош за Украина, бидејќи нејзините магацини се исто така празни, а Полска досега купила повеќе од 800 од овие ракети, додека ѝ се испорачани 208.