Унгарскиот министер за одбрана: Им ја затвораме вратата на Русите

Унгарија и ја затвора вратата на Русија и сè повеќе се усогласува со своите сојузници, изјави унгарскиот министер за одбрана Ромулуш Русин-Сенди на Конференцијата за енергетика и безбедност во Будимпешта.

„Им ја затвораме вратата на Русите“, рече Рушин-Сенди, додавајќи дека „е потребно да се земат предвид интересите и вредностите на земјата и нејзините сојузници“.

Унгарската влада, предводена од премиерот Петер Маѓар, зазеде проевропска насока, за разлика од претходната администрација. Поранешниот премиер Виктор Орбан со години беше познат како еден од најпроруските европски лидери.

Русин-Сенди рече дека откако Унгарија почнала да се дистанцира од Москва, руските разузнавачки служби „се обиделе да се вратат низ задната врата“. Тој додаде дека довербата во сојузите на Унгарија треба да се врати, бидејќи интересите на земјата се совпаѓаат со оние на нејзините партнери.

Според него, Будимпешта во моментов е фокусирана на војната на Русија против Украина, но и на војната меѓу САД и Иран.

Во дополнително појаснување објавено на Фејсбук, Русин-Сенди истакна дека безбедносните и одбранбените приоритети на Унгарија се јасни.

„Нашите интереси во областа на безбедноста и одбраната се сосема јасни. Можеме да градиме стратешки партнерства во одбраната и одбранбената индустрија само со сигурни сојузници. Кога станува збор за националната безбедност, заштитата на критичната инфраструктура, безбедноста на снабдувањето и нашето членство во НАТО, нема простор за компромис“, рече тој.

На 19 јуни, новата влада на Унгарија ја укина деветмесечната забрана за украинските медиуми, воведена од претходната администрација, како дел од напорите за подобрување на односите со Украина.

Сепак, само еден ден претходно, премиерот Петер Маѓар изјави дека Унијата треба да ја намали итноста на пристапувањето на Украина во ЕУ.

фото/ЕПА