Рускиот претседател, Владимир Путин, потпиша закон со кој на руските власти им се овозможува блокирање интернет-страници и изрекување казни за лажни вести и материјали што се сметаат за навредливи за државата и јавноста.

Новиот закон им дозволува на властите да блокираат интернет-страници и кориснички сметки кои објавуваат лажни вести.

Горниот дом на парламентот го одобри предлог-законот на 13 март, а долниот дом, Думата, даде конечна согласност на 7 март.

Црната кутија од авионот на „Етиопијан ерлајнс“ што се урна во неделата е пренесена од Адис Абеба во Париз, соопштија од авиокомпанијата.

„Истражниот тим ја однесе црната кутија од авионот ‘боинг 737-8 макс’ во Париз за анализирање“, се наведува во соопштението.

Авионот се урна во неделата утрото, само шест минути по полетувањето, при што загинаа сите 157 патници и членови на екипажот од најмалку 33 држави.

По несреќата, речиси во сите земји е донесена забрана за летови со моделите ‘боинг 737-8 макс’ и ‘боинг 737-9 макс’.

На крајот на минатата година во Џакарта се урна ист модел на авион како оној во Етиопија. Тогаш во несреќата загинаа 189 луѓе.

Затворската казна на поранешниот шеф на изборната кампања на американскиот претседател, Доналд Трамп, Пол Манафорт, е зголемена за 43 месеци. Одлуката доаѓа една недела откако тој беше осуден на затворска казна од 47 месеци со што вкупната казна е 7,5 години.

Манафорт е осуден за заговор и за финансиски малверзации врз основа на обвиненијата кои се формирани во рамки на истрагата на специјалниот обвинител Роберт Малер за можна руска вмешаност во претседателските избори во САД во 2016 година кога победи Трамп.

Манафорт лани се изјасни за виновен. Тој денеска пред судот кажал дека сака да се извини за неговите постапки и побара поблага казна.

„Жал ми е поради тоа што го направив и поради сите активности кои нè доведоа до ова“, рекол тој.

Трамп ги негираше обвинувањата опишувајќи ја истрагата на Малер како лов на вештерки.