НАТО нема намера да го засили военото присуство во балтичките држави кои бараат поголема заштита од соседна Русија, изјави денеска во Хаг генералниот секретар на НАТО, Јенс Столтенберг.

„Засега не планираме да го засилиме военото присуство во (балтичкиот) регионот, но она што планираме е да ги консолидираме капацитетите и ако биде потребно, да ги засилиме“, рекол Столтенберг по средбата со холандскиот премиер Марк Рут.

Балтичките земји – Естонија, Латвија и Литванија – побараа поголемо воено присуство поради стравување од руски закани. Ова прашање ќе се најде на дневен ред на самитот на НАТО на 11 и 12 јули во Брисел.

Романија ќе биде првата земја од Европската Унија што ќе ја премести амбасадата од Тел Авив во Ерусалим по примерот на САД. Шефот на социјалдемократите изјавил дека одлуката е донесена и дека процедурата е во тек.

Според „Ерусалим пост“, одлуката била донесена во средата кога бил усвоен документ за почеток на постапката за преместување на амбасадата во Ерусалим иако официјално одлуката не е соопштена.

Портпаролот на романската влада не сакал да го коментира документот што бил усвоен во отсуство на министерот за надворешни работи, кој е во посета на Тунис.

Претседателот на САД, Доналд Трамп, во декември лани најави дека американската амбасада ќе биде пренесена од Тел Авив во Ерусалим. Примерот на САД го следеше и Гватемала.

Обвинителството во германскиот град Констанц, во име на уметничката слобода, одби да забрани изведба на сатиричната претстава „Мојата борба“, во текот на која е предвидено делење кукести крстови и жолти ѕвезди. Театарот вети бесплатен влез за сите оние што на ракавите ќе носат ленти со кукест крст на премиерата на 20 април, датумот на раѓањето на Хитлер.

На оние што ќе купат билети, предложено им е да носат Давидова ѕвеза додека се во театарот во знак на солидарност на жртвите на нацизмот. Нацистичките симболи се забранети во Германија, а од театарот навеле дека на овој начин сакааат да покажат колку е лесно луѓето да се корумпираат.

Претставата „Мојата борба“ е црна комедија на Унгарецот Георг Табори од 1987 година и се однесува на програмскиот памфлет што го напишал Хитлер кога бил во затвор пред да ја презеде власта.

Германско-израелското друштво во Констанц и Друштвото за еврејско-христијанска соработка побарале бојкот на претставата.