Јапонија планира да го испрати најголемиот воен брод во Јужното кинеско море

Јапонија планира во мај да го испрати својот најголем воен брод на три месеца во Јужното кинеско море, во најголемата демонстрација на својата воена поморска моќ во овој регион од Втората светска војна, изјавија три извора.

Кина го полага правото на речиси сите спорни води и нејзината растечка воена присутност предизвика загриженост кај Јапонија и Западот. САД одржуваат редовни воздушни и морски патроли, за да обезбедат слободна пловидба.

Носачот на хеликоптери Изумо, најголемиот јапонски воен брод, ќе вплови во Сингапур, Индонезија, на Филипините и Шри Ланка, пред да им се приклучи на заедничките поморски вежби со индиските и американските бродови во Индискиот океан во јули. Враќањето на Јапонија е предвидено во август.

Изумо, долг 249 метри, голем е како јапонските носачи на авиони од Втората светска војна и на него има активна ескадрила до девет хеликоптери.

„Целта е да се тестира способноста на Изумо со неговото испраќање во продолжена мисија“, рече еден од изворите запознаен со планот. „Тој ќе вежба со американската морнарица во Јужното кинеско море“, додаде изворот.

Портпаролот на јапонските поморски сили не ги коментираше ваквите најави.

Јапонската операција доаѓа во време кога се чини дека САД под администрацијата на Доналд Трамп зазема поостра позиција кон Кина. Вашингтон ја критикуваше кинеската изградба на вештачки острови и стационирањето на воена опрема за што постои стравување дека ќе се користи за ограничување на слободната пловидба.

Пекинг во јануари соопшти дека има „неоспорен“ суверенитет над спорните острови откако Белата куќа изјави дека ќе ги брани „меѓународните територии“. /крај/хн/ст