Американскиот државен секретар Џон Кери во четвртокот во Киев изјави дека „руската агресија“ во источна Украина претставува најголемата закана за оваа земја, како и дека САД „нема да ги затвораат очите пред руските тенкови и борци“ кои ја минуваат границата, и истовремено се обидуваат да најдат дипломатско решение за конфликтот, а од домаќинот побара да се сочува специјалниот статус за Донбас, односно двата одметнати рускојазични региони кои самопрогласија ткн „народни републики“ во Донецк и во Луганск.

По разговорот во украинската престолнина со претседателот Петро Порошенко, американскиот државен секретар Џон Кери побара од Москва итно да се ангажира на договорот за прекин на огнот кој беше потпишан меѓу властите во Киев и рускојазичните бунтовници од истокот на земјата во белоруската престолнина Минск ланскиот септември.

„Русија мора да донесе одлуки, а нив не ги прават зборовите туку делата. Тоа значи дека мора да се ангажира на низа потези со коишто ќе го поддржи веќе потпишаниот договор од Минск. Сакаме дипломатско решение на проблемот, но не можеме да ги затвораме очите пред тенковите коишто ја минуваат границата од руска страна и влегуваат во Украина. Не можеме да ги затвораме очите ниту пред руските борци кои ја минуваат границата со униформи без обележја“, рече Кери на заедничката прес-конференција со Порошенко.

„Мора да се исполнат договорите од Минск. Од зоната на конфликтот неопходно е да се повлече тешкото вооружување, и да се повлечат силите, и да се затвори границата. Тоа ќе го утврди суверенитетот на Украина и ќе придонесе за нормализирање на состојбата“, додаде Кери.

Американскиот државен секретар и’ порача на Русија дека тоа е „единствениот начин да избегне меѓународна изолација“ и единствениот пат за постигнување мир за украинскиот народ.

Истакна дека конфликтот во Украина ќе биде запрен само кога ќе се почитува прекинот на огнот, оружјето ќе биде одложено и страните ќе седнат на преговарачката маса.

Според Кери, за да ги достигне овие цели на Украина и’ е потребно лидерството на претседателот Порошенко. Оцени дека Украинците во изминатата речиси една година, од соборувањето на претседателот Виктор Јанукович во март 2014-та, „постигнале многу, морен трансфер на власта, избори, нова влада, работејќи во единство“.

„Во наредните денови ќе бидеме во можноста да изнајдеме начини како да се напредува. Важно е, се разбора, лидерството на Порошенко, за да се постигнат вашите цели“, порача шефот на американската дипломатија пред новинарите.

Кери, исто така, се осврна и на Порошенко треба да го поддржи специјалниот статус за областа под заедничко име Донбас, како дел од минатогодишните преговори, откако рускојазичните бунтовници прво бараа федерализација на Украина по региони, а потоа по продолжувањето на судирите ги прогласија ткн народни републики и одржаа избори.

Американскиот државен секретар смета дека „доколку дипломатијата добие адекватна моќ, можно е да се постигне мир, што е особено важно за регионот и земјата во целина“. „Порошенко утрово ми кажа дека и понатаму го поддржува законот за специјалниот статус на Добнас, кој вклучува и проширување на политичките права на регионот. И тоа е многу важно да не се заборави, како и тоа дека тој ја презема врз себе одговорноста да спроведе уставните реформи и да спроведе регуларни избори во Донбас“, додаде.

Во продолжение на прес-конференцијата Кери рече дека ниту САД, ниту Европа посакуваат конфликт со Москва, „ние бараме дипломатски патишта за решавање на ситуацијата“. „Ние не сакаме конфликт со Русија, нито САД, ниту Европа. Русија е должна да ја искористи таа поддршка којашто ние ја даваме на дипломатското решение на состојбата“, порача Кери.

Претходно Порошенко изјави дека САД и Украина ќе ја зајакнат меѓусебната соработка во сферата на безбедноста. „Ја зајакнуваме нашата соработка во одбраната, за да го пронајдеме најдоброто решение за ситуацијата во земјата. Тоа е многу важно за нас. Благодарен сум за сеопфатната поддршка на нашата земја на патот на реформите од страна на САД“, изјави украинскиот претседател.

„На Украина навистина и’ е потребна помош в борбата против корупцијата, за воспоставување нормална клима за инвестиции и тн. Во овие сфери за нас е многу важно да ја продолжиме соработката со САД“, рече Порошенко./крај/мф/сн

Извор: Reuters/TACC