Шефот на руската дипломатија, Сергеј Лавров, изјави во средата дека НАТО ја одиграл својата деструктивна улога во украинската криза и дека го поттикнува Киев на насилно решавање на конфликтот, отфрлајќи ги притоа обвинувањата за руско воено мешање во Украина како дел од информативната војна.

„Големо внимание привлекува деструктивната улога на НАТО во текот на целата внатрешна криза во Украина. Меѓу останатото, Алијансата почна со зајакнување на воениот потенцијал на Украина, кој, како што е познато, се користи и против цивили. Раководството на НАТО ги поддржува намерите на државите членки во голем обем да ја снабдат Украина со специјални средства, воена опрема, која украинските власти би можеле да ја употребат за внатрешна репресија. На тој начин Киев се поттикнува кон насилно решавање на конфликтот“, рекол Лавров.

Рускиот министер за надворешни работи ја „Расискаја газета“ вели дека плановите за одржување вежба на земјите од Алијансата со Украина на украинска територија, биле обелоденети на неодамнешниот самит во Велс и таа „нема да придонесе за мировниот процес, туку само ќе го продлабочи расколот во украинското општество“, пренесуваат руските агенции.

Лавров обвинувањата за руско воено мешање во Украина, како и повеќепати досега, ги нарекува дел од информативната војна.

„Обвинувањата дека Русија воено се меша во конфликтот се слушаат уште од самиот почеток на кризата од кога нас практично нé обвинуваат за сé. Притоа, ниту еднаш не беа претставени докази за ваквите обвинувања“, истакнува Лавров.

Според него „карактеристичната линија позиција на САД и на некои европски земји“ е „отсуство на докази, премолчувања и искривување на вистината“.

„Тоа се однесува и на тврдењето за придвижувањата на нашата војска и истрагата за катастрофата со малезискиот Боинг, како и трагедиите на Мајдан и во Одеса, и на многу други ситуации“, нагласува шефот на руската дипломатија.

Лавров смета дека денес Украина се наоѓа пред избор или да тргне по патот на „мирот и конструктивниот дијалог“ или „да западне во авторитарност и национал–радикална диктатура“.

 „Одлуката е на Киев во украинското општество“, порачува рускиот министер, додавајќи дека се појавила реална шанса за прекин на братоубиствената војна, за што паралелно со одржувањето на прекинот на огнот потребно е што побрзо да се покрене отворен дијалог со учество на сите региони и политички сили.

За избегнување на натамошна ескалација во Украина, како што истакнува Лавров, многу важно е сите „без исклучок н надворешните играчи“ да покажат воздржаност.

„Тоа за жал, не може да се рече за постапувањето на некои западни лидери, кои наместо да направат сериозна анализа на комплицираната ситуација во внатрешно социјално – политички процеси во земјата, повеќе сакаат неосновано да префрлат на Русија целосна одговорност за она што се случува“, нагласил Лавров.

 „Нашата позиција е потполно јасна – сакаме мир во Украина кој може да биде постигнат само со широк национален дијалог, рекол рускиот министер и додава дека продолжувањето со притисок врз Русија нема да помогне да се реши украинската криза, туку дека тоа само ќе ја продлабочи истата.

За новиот пакет санкции на ЕУ кон Русија, кој стапи на сила на 12-ти септември, Лавров вели дека тоа претставува одговор на Брисел на резултатите од средбата на Контакт – групите во Минск за решавање на ситуацијата во Украина кои „воопшто не ја уважуваат реалноста“ и „испраќаат сигнал за директна поддршка на „партијата на војната“ во Киев“.

Шефот на руската дипломатија притоа изразува надеж дека, „на крајот ќе преовлада прагматизмот и здравиот разум во пристапот на партнерите“, а Русија го задржува правото да презема мерки за заштита на своите легални интереси.

„САД, ЕУ и другите земји на крај треба да го слушнат гласот на разумот и да го прекинат бесмисленото „оро“ активности по принципот „око за око, заб за заб“, кое всушност тие сами го започнаа“, додал Лавров./крај/мф/ап