Авионот со кој министерот за одбрана на САД, Ештон Картер се враќаше од петдневната посета на Париз и швајцарски Давос, не можеше да се приземји во воздухопловната база „Енрјус близу главниот град Вашингтон поради налетите на снежната бура Џонас, наречена во медиумите Сноузила, којашто однесе најмалку девет животи и стотици илјади остави без електрична енергија на американскиот исток.

Како што пишува весникот The Washington Post, авионот со кој челникот на Пентагон Ештон Картер се враќаше од Светскиот економски форум во Давос, наместо да слета во сојузната држава Мериленд, бил пренасочен во државата Флорида. Слетал на аеродромот во градот Тамапа, каде што безбедно ќе чека да мине невремето пред да се врати во американската престолнина Вашингтон.

Од петокот попладнето источниот брег на САД го зафати силен циклон, во чиј центар се најде областа на главниот град, како и околните држави Мериленд, Вирџинија и Пенсилванија. Обилните снежни врнежи продолжија и во саботата навечер и се очекуваат на места рекордни снежни покривки. Станува збор за еден од најголемите снежни врнежи во историјата на САД кој продолжува повеќе од едно деноноќие, а во областа на Вашингтон веќе се наврнати половина метар снег.

Според Националната метеоролошка служба на САД, во областа на меѓународниот аеродром Далес, во предградие на Вашингтон, каде е поставена мерна станица, нападнале околу 58 сантиметри снег. Тоа е втората најголема дебелина на снежната покривка во историјата на тамошните метеоролошки набљудувања по 1922 година, кога за 48 часа наврнале 66 сантиметри снег

Во Вашингтон се очекуваа и ветар со брзина од 90 километри на час, голомразица и поплави на брегот.

Покрај Вашингтон, снежната бура Џонас опфати уште 11 сојузни држави, каде што властите прогласија вонредни ситуации. Во Њујорк во текот на ноќта се очекува кулминација на виулицата, со врнежи од пет сантиметри снег на час, а се очекува дека вкупно може да наврне околу 60 сантиметри снег. Ситуацијата ја прават уште посложена силните налети на ветрот.

Њујоршките власти во саботата рано попладнето по локално време целосно го забранија патниот сообраќај, освен за возилата на итните служби. „Ова веројатно ќе биде едно од најголемите невремиња во историјата на градот“, изјави градоначалникот Бил де Блазио, пренесува телевизиската мрежа NBC.

Заглавените возачи се згрижуваат во засолништата на Црвениот крст во државата Кентаки. Таму илјадници луѓе беа завеани ноќта кон саботата на замрзнатиот автопат 175 правејќи колона долга 60-ина километри, а властите и во другите држави предупредуваат да не се излегува на отворен пат без итна потреба. Околу 2.200 припадници на Националната гарда се повикани да помогнат во справувањето со невремето во 12 сојузни држави, соопшти министерството за одбрана.

„Снегот кој без престан врне во последните 24 ласа, ќе продолжи да паѓа во најгусто населените области на САД, но виулицата ќе ослаби во недела“, предвидува на својата интернет страница метеоролошката служба.

Најмалку девет луѓе ги загубија животите, соопштуваат локалните власти. Седум мртви има во Северна Каролина, и по една во Вирџинија и Кентаки. „Сите настрадаа во сообраќај“, откако во петокот започна снежното невреме, изјавила за AFP портпаролката на службата за итни состојби во Северна Каролина, Никол Мејстер. Во Кентаки кобен бил судар на автомобил и возило за чистење на снегот, извести портпаролката на санитарната служба, Џил Мидкиф.

Под тежината на снежната покривка пукнале електричните водови, што предизвика прекин во снабдувањето со електрична енергија, имајќи предвид дека електромрежата во САД ретко е вкопана во земја. Речиси 140.000 жители се без струја во Северна Каролина, според тамошниот оператор. Во Њу Џерси 90.000 луѓе од раните попладневни часови во саботата останале без електрична енергија, изјави гувернерот Крис Кристи.

Метеоролошкиот феномен кој весникот The Washington Post го нарече „Сноузила“ според филмот во кој гигантскиот гуштер уништува градови, беше најавен од службите за предупредување, на населението беа снабдени со продукти, како што им беше советувано за 72 часа, пред надоаѓањето на невремето.

Аеродромите и воздухопловните компании навремено реагираа и откажаа десетици илјади летови. Воздухопловните компании откажаа повеќе од 7.100 летови во петокот и во саботата, а во петокот уште други 7.000 летови доцнеа. Во саботата беа откажани уше 5.000 други летови, според интернет ресурсот Flightaware.com./крај/мф/сн

Извор: Макфакс