(Видео) Путин за прв пат го посети спорниот остров во близина на Јапонија: Токио остро протестира

Рускиот претседател Владимир Путин го посети Итуруп, еден од островите во спорниот синџир Курилски Острови, за кој Јапонија тврди дека е негов, објавија руските медиуми во четврток. Неговата посета дојде еден ден по големите поморски вежби и ракетниот тест од страна на Северна Кореја, објави Ројтерс.

Долгогодишен спор
Москва и Токио не потпишаа формален мировен договор од Втората светска војна. Клучна пречка за нормализирање на односите е територијалниот спор околу островите, кои Јапонија ги нарекува свои Северни територии.

Според извештајот на државната новинска агенција ТАСС, ова е прва посета на Путин на спорните острови. На Итуруп, тој го посети погонот за преработка на риба Јасни, откако претходно ги надгледуваше поморските вежби на рускиот Далечен Исток.

Реакција на Јапонија
Јапонскиот министер за надворешни работи Тошимицу Мотеги упати протест против посетата на Путин во објава на социјалната мрежа Икс.

„Северните територии, вклучувајќи го и Еторофу, се историски и според меѓународното право неразделен дел од јапонската територија“, напиша Мотеги, додавајќи: „Јапонија остро протестира против оваа посета“.

– Какая у вас погода хорошая, курорт прям
– А мы думали это вы договорились
– Может быть

Путину на Курилах понравилось pic.twitter.com/6wdrnQJaGL

— Кремлевский пул РИА (@Kremlinpool_RIA) August 13, 2026

Детали за посетата
Телевизискиот канал „Вести“ објави снимка од Путин во темно одело како разгледува две големи туни. Двајцата службеници му објаснија детали за риболовот и миграцијата на рибите. За време на обиколката, Путин проба и локален кавијар.

„Времето ви е прекрасно, како во одморалиште“, им рече Путин на група локални жители. „А ние помисливме дека вие го нарачавте“, одговори со смеа една жена во триесеттите години.